Saudiya Arabistonida turar-joy binosiga snaryad tushdi: halok bo‘lganlar bor
Qurbonlar Bangladesh va Hindiston fuqarolari ekani ma’lum qilindi.
Saudiya Arabistonida turar-joy binosiga snaryad kelib tushishi oqibatida ikki kishi halok bo‘ldi, yana 12 kishi jarohat oldi. Bu haqda qirollik Fuqarolik mudofaasi xizmati ma’lum qildi.
Hodisa poytaxt Ar-Riyodning janubi-sharqida joylashgan Al-Xarj viloyatida sodir bo‘lgan. Ma’lumotlarga ko‘ra, texnik xizmat ko‘rsatish va tozalash kompaniyasiga tegishli turar-joy uyiga snaryad kelib tushgan.
Rasmiylarning bildirishicha, halok bo‘lganlar hamda jarohatlanganlar Bangladesh va Hindiston fuqarolari bo'lgan. Ular ushbu binoda ishlash uchun kelgan xorijlik ishchilar sifatida yashab kelgan.
Fuqarolik mudofaasi xizmati ijtimoiy tarmoqlarda qutqaruv ishlari davom etayotganini, qurbonlar soni aniqlashtirilayotganini ma’lum qildi. Rasmiylar hudud aholisi va yaqin atrofdagilarni ehtiyot choralarini ko‘rishga hamda shikastlangan binolarga yaqinlashmaslikka chaqirdi.
Avvalroq Saudiya Arabistoni havo mudofaasi tizimlari Al-Xarj hududi ustida uchayotgan qanotli raketani tutib olgani haqida ham xabar berilgan. Rasmiy ma’lumotlarga ko‘ra, raketa Saudiya Arabistoni hududidan uchirilgan bo‘lib, havo mudofaasi kuchlari tomonidan zararsizlantirilgan.
