Toshkentda voyaga yetmagan o‘g‘illariga mashina bergan ota 5 sutkaga qamaldi
Hujjatsiz avtomobil boshqargan bolalar sabab qo‘shnilar ularning otasi bilan gaplashmoqchi bo‘lgan, ammo erkak ular bilan janjallashib, haqorat qilgan.
Ijtimoiy tarmoqlarda bir erkak qo‘shnilari bilan tortishib, ulardan birini haqorat qilgani aks etgan video tarqaldi. Videodagi izohlarga ko‘ra, erkakning voyaga yetmagan o‘g‘illari — Hasan va Husan avtomobilni bir necha bor hujjatlarsiz boshqargani aytilgan.
Guvohlarning so‘zlariga ko‘ra, ular mahalla hududida ham avtomobilni yuqori tezlikda haydagan.
Mazkur holat yuzasidan Toshkent shahar Ichki ishlar bosh boshqarmasi ma’lumot berdi. Qayd etilishicha, 7-mart kuni soat 21:00 atrofida qo‘shni fuqarolardan biri vaziyatni tinch yo‘l bilan muhokama qilish va bolalarga tanbeh berishni so‘rash maqsadida fuqaro Nozim Azizovning uyiga borgan.
Biroq, ma’lum qilinishicha, ota farzandlarini to‘xtatish o‘rniga ularni himoya qilgan. Guvohlarning aytishicha, u qo‘shni ayolni haqorat qilib, baland ovozda baqirgan va mahalla aholisining tinchligini buzgan.
Mahalladagi kelishmovchilik yuzasidan 102 qisqa raqamiga murojaat qilingan. Voqea joyiga yetib kelgan ichki ishlar xodimlari tomonlarni bo‘limga olib borib, holat yuzasidan surishtiruv ishlarini olib borgan.
Sudning 8-mart kuni qabul qilingan qaroriga ko‘ra, 1981-yilda tug‘ilgan fuqaro Nozim Azizovga nisbatan O‘zbekiston Respublikasi Ma’muriy javobgarlik to‘g‘risidagi kodeksining 183-moddasi asosida 5 sutka ma’muriy qamoq jazosi tayinlandi.
