AQSh va Isroil hujumlari to‘xtamagunicha neft blokadasi davom etadi — Eron
Urush natijasida Ho‘rmuz bo‘g‘ozi yopildi, tankerlar bir haftadan ortiq harakat qila olmayapti, ishlab chiqaruvchilar quvvatni to‘xtatishga majbur bo‘lmoqda.
Islom inqilobi qo‘riqchilari korpusi seshanba kuni AQSh va Isroil hujumlari davom etsa, Yaqin Sharqdan hatto "bir litr neft" ham olib o‘tilishiga yo‘l qo‘ymasliklarini bildirdi. Bu haqda Reuters xabar bermoqda.
Qayd etilishicha, mazkur bayonotga javoban Tramp Eron Agar Ho‘rmuz bo‘g‘ozi orqali tankerlar harakatini to‘sishga harakat qilsa, AQSh zarbalarining yanada keskinlashishidan ogohlantirgan.
“Biz ularga shunchalik kuchli zarba beramizki, ular yoki ularga yordam berayotgan boshqa hech kim bu hududni qayta tiklay olmaydi”, — dedi Tramp dushanba kuni matbuot anjumanida.
Trampning bayonoti global moliya bozorlarida dushanba kuni keskin tebranishlarga sabab bo‘ldi. Chunki investorlar Eron xavfsizlik tuzilmalari yangi oliy rahbar Mujtabo Xomanaiy ortida birlashib, qisqa muddatda taslim bo‘lmasligi mumkinligidan xavotirda edi.
Tramp AQSh Eron harbiylariga jiddiy zarar yetkazganini aytib, mojaroning boshlang‘ich to‘rt haftalik muddatdan ancha oldin tugashini taxmin qilgan, ammo g‘alaba qanday ko‘rinishda bo‘lishini ma’lum qilmagan. Isroil esa urush maqsadi Eronning ruhoniy boshqaruv tizimini ag‘darish ekanini bildirmoqda.
AQSh rasmiylari asosan Vashingtonning maqsadi Eronning raketa imkoniyatlari va yadroviy dasturini yo‘q qilish ekanini aytmoqda, ammo Tramp urush faqat Eronda itoatkor hukumatning vujudga kelishi bilan tugashi mumkinligini bildirgan.
Eronning BMTdagi elchisi ma’lumotlariga ko‘ra, AQSh va Isroil fevral oxirida Eron bo‘ylab havo va raketa zarbalarini boshlaganidan beri kamida 1 332 nafar tinch aholi halok bo‘lgan va minglab kishi yaralangan.
