Energiya inqirozi fonida Pokistonda maktablar yopiladi va ish haftasini qisqartiriladi
Davlat xarajatlarini kamaytirish doirasida amaldorlar maoshi qisqartirilib, xizmat transportidan foydalanish cheklanadi.
Pokiston hukumati energiya resurslari sarfini kamaytirish va davlat xarajatlarini qisqartirish maqsadida mamlakat miqyosida qator qat’iy tejamkorlik choralarini joriy etishini e’lon qildi. Bu haqda Dawn nashri xabar berdi.
Ma’lum qilinishicha, ushbu qarorlar Yaqin Sharqdagi keskinlashgan geosiyosiy vaziyat hamda energiya bozoridagi beqarorlik fonida qabul qilingan.
Xususan, Shahboz Sharif mamlakatga telemurojaat qilib, dunyo bozorida neft narxi 100 dollardan oshib ketgani iqtisodiyot uchun jiddiy xavf tug‘dirayotganini ta’kidlagan.
Bosh vazirning ma’lum qilishicha, energiya sarfini kamaytirish maqsadida bir qator cheklovlar joriy etiladi. Jumladan, mamlakatdagi barcha maktablarda 16-martdan 31-martga qadar ikki haftalik ta’til e’lon qilinadi, oliy ta’lim muassasalarida esa darslar vaqtincha onlayn shaklga o‘tkaziladi.
Shuningdek, davlat sektorida ishlovchilarning 50 foizi masofaviy ishlash tizimiga o‘tkaziladi. Ayrim sohalar bundan mustasno holda, ish haftasi to‘rt kunlik tartibga o‘tkazilishi rejalashtirilmoqda.
Davlat xarajatlarini qisqartirish doirasida hukumat a’zolari va yuqori lavozimli amaldorlar uchun ham qator cheklovlar belgilandi.
Xususan, federal va provinsiya hukumatlari a’zolari ikki oy davomida maosh va nafaqalardan voz kechadi, deputatlar maoshi esa 25 foizga qisqartiriladi. Oyligi 300 ming rupiyadan ortiq bo‘lgan ayrim amaldorlar ikki kunlik ish haqidan voz kechadi.
Bundan tashqari, xizmat avtomobillari uchun yonilg‘i limiti 50 foizga kamaytiriladi, davlat idoralaridagi transport vositalarining 60 foizi esa vaqtincha foydalanishdan chiqariladi. 2026-yil iyun oyiga qadar davlat idoralari uchun yangi avtomobil, mebel va konditsioner xarid qilish ham taqiqlanadi.
Hukumat rasmiy tadbirlarni o‘tkazish tartibini ham chekladi. Jumladan, rasmiy tushlik va iftorlik marosimlarini o‘tkazish taqiqlanadi, seminar va konferensiyalar esa faqat davlat binolarida tashkil etilishi belgilandi. Vazirlar va maslahatchilar uchun zarur bo‘lmagan xorijiy xizmat safarlari ham vaqtincha bekor qilinadi.
Bosh vazir Shahboz Sharif o‘z murojaatida mintaqada keskinlashgan vaziyat energiya bozoriga jiddiy bosim o‘tkazayotganini ta’kidladi. U Eron, Isroil va AQSH o‘rtasidagi qarama-qarshiliklar fonida neft narxining keskin oshishi butun mintaqa iqtisodiyotiga tahdid solayotganini qayd etdi.
Shuningdek, hukumat neft mahsulotlarini yashirib, sun’iy ravishda narx oshirishga urinayotgan shaxslarga nisbatan qat’iy choralar ko‘rilishini ham ogohlantirdi.
