Eron milliy futbol jamoasi murabbiyi Avstraliyadan boshpana so‘radi, jamoa Eronga qayta olmaydi — CNN
Avvalroq Eron milliy jamoasining besh nafar boshqa futbolchisiga Avstraliya hukumati gumanitar vizalar bergan edi.
Eron ayollar futbol jamoasi Avstraliyani tark eta olmayapti, chunki ularning Eronga qaytadigan samolyotini qabul qiladigan hech bir davlat topilmagan. Bu haqda CNN xabar bermoqda.
Jamoa avtobusi seshanba kuni ertalab mehmonxonadan chiqib, aeroportga yo‘l olishi va ona yurtiga uchishi kerak edi. Biroq, CNN sport jurnalisti Raha Purbaxshning ma’lum qilishicha, Eron sportchilari va jamoa xodimlari hozircha Avstraliyani tark eta olmayapti.
Iran International TV telekanalida ishlovchi Purbaxsh shuningdek, yana ikki kishi — bir futbolchi va Eron milliy jamoasi murabbiyi ham Avstraliya hukumatidan boshpana so‘raganini bildirgan.
Bundan avval, Eron milliy jamoasining besh nafar boshqa futbolchisi ham boshpana so‘ragan bo‘lib, Avstraliya hukumati ularga allaqachon gumanitar vizalar bergan edi.
Eron ayollar futbol jamoasi Osiyo kubogida ishtirok etgan, biroq bir o‘yindan oldin mamlakat madhiyasini ijro etishdan bosh tortgan. Futbolchilar ona yurtga qaytganda ta’qib qilinishdan qo‘rqib Avstraliyadan boshpana so‘ragan.
