Erondagi maktabga AQSh raketasi zarba bergani aniqlandi
Vashington bu halokatli hujumga AQSH javobgar bo‘lishi mumkinligini, ammo maktab atayin nishonga olinmaganini ma’lum qilgan.
Eronning Minob shahridagi qizlar maktabiga qilingan hujumda AQShning Tomhawk raketasi ishlatilgani aniqlandi. Bu haqida video tahlillarga tayanib BBC Verify xizmati xabar bermoqda.
Eron rasmiylarining ma’lum qilishicha, hujum natijasida 168 kishi, jumladan taxminan 110 nafar o‘quvchi halok bo‘lgan.
Mehr axborot agentligi tomonidan e’lon qilingan, BBC Verify tomonidan haqiqiyligi tasdiqlangan videoda raketa Minab shahridagi "Shajareh Tayabeh" boshlang‘ich maktabi yonidagi Eron Islom inqilobi qo‘riqchilari korpusi bazasiga zarba berishidan oldingi holat aks etgan.
BBC Verify ilgari sun’iy yo‘ldosh tasvirlari, tasdiqlangan videolar va ekspert tahlillari orqali maktab yaqinidagi hududga bir qator zarbalar berilganini aniqlagan.
Ekspertlar so‘nggi video Tomahawk raketasi bilan hududga bir nechta zarbalar berilgani, bu operatsiyaning AQSh tomonidan amalga oshirilganini ko‘rsatishini aytishgan. Ekspertlar shuningdek, na Isroil, na Eron Tomahawk raketasiga ega emasligini ta’kidlagan.
“Birgina Eron raketasi ayni vaqtda maktabni nishonga olib, bunday yuqori o‘lim holatini keltirib chiqarishi haqiqatdan yiroq”, — degan ekspertlar.
Shanba kuni AQSh Prezidenti Donald Tramp Eronga tegishli qurollar aniq mo‘ljal olmasligini aytib, maktabdagi hodisada mamlakatning o‘zini ayblagan edi.
BBC'ning AQShdagi hamkori CBS'ga ko'ra, Vashington bu halokatli hujumga AQSH javobgar bo‘lishi mumkinligini, ammo maktab maqsadli tarzda nishonga olinmaganini ma’lum qilgan.
Isroil hukumati manbasi CBS News'ga bergan ma’lumotda, Isroil bu hujum ortida emasligi va uning armiyasi maktab yaqinida faoliyat yuritmaganini bildirgan.
