Germaniyaning Iordaniyadagi harbiy bazasi Eron raketalari zarbasiga uchradi — Spiegel
Nemis harbiylari joylashgan kazarmalar zarbaga uchragan, ular hujum paytida boshpanalarda bo‘lgan, hech kim jabrlanmagan.
Eron hududidan uchirilgan ballistik raketalar 8-9-mart kunlari Iordaniyadagi Al-Azraq aviabazasining Germaniya sektoriga hujum chog‘ida quladi. Bu haqda Spiegel nashriga tayanib, BBC xabar berdi.
Nashr ma’lumotiga ko‘ra, nemis harbiylari joylashgan kazarmalar zarbaga uchragan, ular hujum paytida boshpanalarda bo‘lgan, hech kim jabrlanmagan. Xuddi shu aviabazada AQSH harbiy-havo kuchlari ham joylashgan.
“Raketalarning o‘zi kazarmalarga tegdimi yoki ularga havo hujumidan mudofaa tomonidan urib tushirilgan raketa qoldiqlari tushdimi, hozircha aniq emas”, deyiladi xabarda.
Qayd etilishicha, Germaniya harbiy kontingenti bir necha yillardan beri Al-Azraqda doimiy ravishda joylashtirilgan, biroq AQSH va Isroilning Eronga qarshi urushi boshlanganidan keyin shaxsiy tarkib qisqartirilgan.
