Orolning qurigan tubida cho‘l o‘simliklari ekish tadbirlari boshlandi
Ushbu tadbirlarni sifatli amalga oshirish maqsadida Qoraqalpog‘iston Respublikasi va barcha viloyatlardan jami 730 ta texnika va mexanizmlar, 2 ta AN-2 samolyoti, 622 nafar o‘rmon xo‘jaligi ishchilari va mexanizatorlar jalb etilgan.
Qoraqalpog‘iston Respublikasining Mo‘ynoq tumanida – Orol dengizining qurigan tubida saksovul ekish ishlariga start berildi.
Shu munosabat bilan tashkil etilgan tadbirda O‘zbekiston Respublikasi Prezidentining ekologiya masalalari bo‘yicha maslahatchisi – Ekologiya va iqlim o‘zgarishi milliy qo‘mitasi raisi A.Abduhakimov, Prezidentning Orolbo‘yi mintaqasini barqaror rivojlantirish masalalari bo‘yicha maslahatchisi T.Xudaybergenov, O‘rmon agentligi direktori E.Muhiddinov, Favqulodda vaziyatlar vazirining birinchi o‘rinbosari S.Zufarov, Qoraqalpog‘iston Respublikasi Juqorg‘i Kengesi mas’ullari, o‘rmonchilar, ekologlar hamda keng jamoatchilik vakillari ishtirok etdi.
Aytish o‘rinliki, Davlat rahbarining bevosita tashabbusi bilan Orol dengizining qurigan tubida 2018-2025 yillar davomida 2 mln gektar maydonda “yashil qoplama” – himoya o‘rmonzorlari barpo etildi. Ushbu o‘rmon-meliorativ tadbirlari uchun 7,8 ming tonna saksovul, qoraburoq, cherkez, qandim kabi cho‘l o‘simliklarining urug‘i jamg‘arildi.
Har yili o‘rtacha 1000 tagacha texnika va mexanizmlar, 4 ta samolyot, 2 ta motodeltaplan jalb etildi. Ekish tadbirlarida 2 ming nafardan ziyod aholi, ishchi-xodim va mexanizatorlar ishtirok etdi. Kelgusidagi o‘rmon barpo etish ishlari uchun yiliga 100 gektardan kam bo‘lmagan maydonlarda saksovul niholxonalari tashkil etildi.
Tadbirda so‘z olgan Ekologiya qo‘mitasi raisi A.Abduhakimov keyingi yillarda Orolning qurigan tubida cho‘llanishning oldini olish, iqlim o‘zgarishlarining salbiy oqibatlarini yumshatish, biologik xilma-xillikni saqlash hamda ekotizimlarni mustahkamlash borasida amalga oshirilayotgan ishlarni e’tirof etdi.
“Orolning qurigan tubida amalga oshirilgan barcha ishlar mamlakatimizda ekologik muhitning yaxshilanishiga xizmat qilmoqda. Bu yerda, shunday sharoitda cho‘l o‘simliklari ekish tadbirlarida qatnashish barcha ishtirokchilar, ayniqsa, yoshlar uchun katta baxt. Ahamiyatlisi, ekologik nuqtayi nazardan olib qaralganda, Orol hududida qilingan bu ishlar bugun o‘zining samarasini ko‘rsatmoqda, kelgusida ham bu tadbirlar izchil davom ettiriladi, ” – dedi A.Abduhakimov.
Ta’kidlash joizki, joriy yilda ham bu tadbirlarni sifatli amalga oshirish maqsadida Qoraqalpog‘iston Respublikasi va barcha viloyatlardan jami 730 ta texnika va mexanizmlar, 2 ta AN-2 samolyoti, 622 nafar o‘rmon xo‘jaligi ishchilari va mexanizatorlar jalb etilgan.
Shu kunlarda Orol dengizining qurigan tubida cho‘l o‘simliklari ekish tadbirlari qizg‘in davom etmoqda.
