O‘zbekistonda ikki oy ichida 45 ta jinoiy guruh faoliyati to‘xtatildi
Shuningdek, 3150 ta jinoyat ishi qo‘zg‘atilgan, 2934 nafar shaxs ma’muriy javobgarlikka tortilgan va 980 nafar shaxsga qamoq ehtiyot chorasi tayinlangan.
2026-yilning yanvar va fevral oylarida kriminogen vaziyatni barqarorlashtirish bo‘yicha keng ko‘lamli tezkor tadbirlar o‘tkazilishi natijasida 45 ta jinoiy guruh faoliyatiga chek qo‘yildi. Bu haqda IIV ma’lum qildi.
Ma’lumotlarga ko‘ra, tadbirlar davomida 116 ta tovlamachilik, 315 ta noqonuniy qurol saqlash, 86 ta qimorxona faoliyati va 40 ta odam savdosi kabi jinoyatlar aniqlangan. Shuningdek, 790 ta OIV infeksiyasini tarqatish, fohishaxona tashkil etish kabi jinoyatlar ham fosh qilingan. Qidiruvda bo‘lgan 533 nafar shaxs ushlanib, ularga nisbatan jazo choralari qo‘llanilgan.
Yanvar-fevral oylarida jami 3150 ta jinoyat ishi qo‘zg‘atilgan, 2934 nafar shaxs ma’muriy javobgarlikka tortilgan va 980 nafar shaxsga qamoq ehtiyot chorasi tayinlangan.
Qayd etilishicha, noqonuniy qurollar bilan bog‘liq 315 ta ish davomida 4570 ta sovuq qurol musodara qilingan. Jumladan 50 ta bita, 72 ta kastet, 4004 ta o‘tkir tig‘li jism va 444 ta boshqa turdagi qurol. Shu bilan birga, 5814 dona o‘q-dori va 3,715 kilogramm portlovchi moddalar daliliy ashyolar sifatida olingan.
Ijtimoiy tarmoqlarda jinoyatchilikka undovchi va yoshlar orasida buzg‘unchi g‘oyalarni targ‘ib qiluvchi 47 ta akkaunt ham bloklangan.
Shuningdek, Ichki ishlar vazirligi vakillari jinoyatchilikning barcha ko‘rinishlariga qarshi qat’iy choralar ko‘rilayotgani va jamiyatda xavfsiz va sog‘lom muhitni ta’minlash ishlari davom etayotganini ta’kidladi.
