Surxondaryoda maktab o‘qituvchisi katta miqdorda narkotik modda sotayotganda qo‘lga olindi
Shuningdek, Sirdaryoda tojikistonlik narkokurerlar chagaradan uloqtirgan 6 sumka narkotik moddani qabul qilib olgan ikki shaxs ushlandi.
Tojikistondan noqonuniy olib kirilgan jami 77 kilogrammdan ortiq narkotik modda musodara qilindi. Bu Zamon.uz'ga DXX xabar berdi.
Ma’lum qilinishicha, tegishli davlat organlari tomonidan o‘tkazilgan operatsiyada Tojikistondan kontrabanda yo‘li bilan olib kirilayotgan yirik miqdordagi giyohvand moddalar to‘xtatib qolingan.
Xususan, O‘zbekiston–Tojikiston davlat chegarasining Xovos tumani Sharqobod mahallasi hududidan o‘tuvchi qismida tojikistonlik narkokurerlar tomonidan chegaradagi sim to‘siq orqali uloqtirilgan 6 ta sumkani qabul qilib olayotgan paytda ikki nafar mahalliy fuqaro qo‘lga olingan. Sumkalardan 8 kg 314 gramm geroin va 54 kg 458 gramm opiy topilgan.
Mazkur holat yuzasidan gumonlanuvchilarga nisbatan Jinoyat kodeksining 246-moddasi 2-qismi hamda 25, 273-moddasi 5-qismi bilan jinoyat ishi qo‘zg‘atilib, ularga nisbatan qamoq ehtiyot chorasi qo‘llanilgan.
Shuningdek, Surxondaryo viloyatida ham narkotik moddalar savdosiga oid yana bir holat fosh etildi. Sariosiyo tumanida o‘tkazilgan tezkor tadbirda mahalliy maktablardan birida o‘qituvchi bo‘lib ishlovchi fuqaro 14 kg 680 gramm opiy moddasini 180 ming AQSH dollariga sotayotgan vaqtida ashyoviy dalillar bilan qo‘lga olingan.
Tergov ma’lumotlariga ko‘ra, ushbu narkotik moddalar ham tojikistonlik narkokurerlar tomonidan yetkazib berilgan.
Gumonlanuvchiga nisbatan Jinoyat kodeksining 273-moddasi 5-qismi bilan jinoyat ishi qo‘zg‘atilib, unga nisbatan ham qamoq ehtiyot chorasi qo‘llangan. Hozirda uning ehtimoliy jinoiy sheriklarini aniqlash bo‘yicha tezkor-tergov harakatlari davom etmoqda.
