Tojikiston Prezidenti Eron oliy rahbariga tabrik yo‘lladi
Imomali Rahmon Rossiya Prezidenti Vladimir Putin va Ozarbayjon Prezidenti Ilhom Aliyevdan keyin Mujtabo Xomanaiyni tabriklagan uchinchi davlat rahbari bo‘ldi.
Tojikiston prezidenti Imomali Rahmon Mujtabo Xomanaiyni Eron Islom Respublikasining yangi oliy rahbari etib saylangani bilan tabrikladi. Bu haqda Tojikiston prezidenti matbuot xizmati ma’lum qildi.
Tabrik maktubida Imomali Rahmon Eron xalqining mamlakat oldida turgan murakkab sinovlarni yangi rahbar boshchiligida yengib o‘tishiga ishonch bildirgan.
Shuningdek, Tojikiston yetakchisi Eronning mintaqaviy hamda global miqyosda tinchlik va barqarorlikni mustahkamlashdagi rolini yuqori baholab, ikki davlat o‘rtasidagi hamkorlikni o‘zaro ishonch va hurmat tamoyillari asosida yanada rivojlantirishga tayyor ekanini ham ta’kidlagan.
Imomali Rahmondan avval Rossiya Prezidenti Vladimir Putin va Ozarbayjon Prezidenti Ilhom Aliyev ham Mujtabo Xomanaiyni tabriklagan edi.
9 mart kuni Eronning 88 nafar a’zodan iborat Ekspertlar kengashi Mujtabo Xomanaiyni mamlakatning yangi oliy rahbari etib saylagan edi. U siyosiy va ijtimoiy masalalarda tajribaga ega diniy arbob sifatida ta’riflanmoqda.
Shundan so‘ng Islom inqilobi qo‘riqchilari korpusi yangi rahbarga sodiqlik qasamyodini qabul qilgani bildirildi.
