Tramp va Putin Erondagi urushni yakunlash masalalarini ko‘rib chiqdi
Ukrainadagi vaziyatni hal qilish bo‘yicha ham muzokara o‘tkazilgan.
AQSH Prezidenti Donald Tramp dushanba kuni Rossiya Prezidenti Vladimir Putin bilan telefon orqali gaplashdi va suhbatda Eron urushi hamda Ukraina mojarosini yakunlash bo‘yicha harakatlar muhokama qilindi. Bu haqida Kremlga tayanib Axios xabar bermoqda.
Rossiya prezidentining yordamchisi Yuriy Ushakovning so‘zlariga ko‘ra, davlat rahbarlari muloqotida Eron atrofidagi mojaro va Ukrainadagi vaziyatni hal qilish bo‘yicha muzokaralarga urg‘u berilgan.
Suhbat AQSH prezidenti tashabbusi bilan bo‘lib o‘tgan. Ikki mamlakat prezidentlari Erondagi vaziyat yuzasidan batafsil fikr almashgan.
Telefon suhbati davomida Putin Erondagi mojaroni tezroq siyosiy-diplomatik yo‘l bilan hal qilishga qaratilgan qator mulohazalarini bildirgan. Shu bilan birga, Rossiya rahbari AQSH va shaxsan Trampning Ukraina mojarosini hal qilishdagi vositachilik sa’y-harakatlarini ijobiy baholashini qayd etgan.
Qo‘shma Shtatlar prezidentining so‘zlariga ko‘ra, suhbat chog‘ida Putin Yaqin Sharqdagi vaziyatni tartibga solishga ko‘maklashishga tayyorligini bildirgan. Ukraina mavzusining muhokamasi ham ijobiy tarzda o‘tkazilgan.
Avvalroq Rossiya prezidentining matbuot kotibi Dmitriy Peskov Yaqin Sharqdagi urush Moskvaning urushi emasligini va uni faqat boshlagan odam to‘xtatishi mumkinligini aytgan edi.
