2026-yilda kimyo sanoatida 9,5 mlrd dollarlik 133 ta loyiha amalga oshiriladi

 

Shavkat Mirziyoyev 11-mart kuni kimyo sanoatida yirik investitsiya loyihalarini amalga oshirish hamda yangi ishlab chiqarish quvvatlarini ishga tushirish bo‘yicha olib borilayotgan ishlar yuzasidan taqdimot bilan tanishdi.

 

Tanqidiy ruhda o‘tgan yig‘ilishda tarmoqni “maqsad – harakat – natija” tamoyiliga asoslangan yangi strategik rejalashtirish tizimi asosida rivojlantirish zarurligi ta’kidlandi. Kimyo mahsulotlari ishlab chiqarish hajmini oshirish, yangi quvvatlarni ishga tushirish hamda eksport salohiyatini kengaytirish bo‘yicha aniq vazifalar belgilandi.

 

Joriy yilda kimyo sanoati mahsulotlari eksportini 720 million dollarga yetkazish rejalashtirilgan. Qishloq xo‘jaligini zarur o‘g‘itlar bilan ta’minlash maqsadida 1,12 million tonna azotli, 135 ming tonna fosforli va 222 ming tonna kaliyli o‘g‘it ishlab chiqarish vazifasi qo‘yildi.

 

Ma’lum qilinishicha, 2026-yilda tarmoq va hududlarda 9,5 milliard dollarlik 133 ta loyiha amalga oshiriladi hamda 2,5 milliard dollar investitsiya jalb etiladi. Shu jumladan, 24 ta strategik loyiha doirasida 7 ta yangi ishlab chiqarish quvvati ishga tushiriladi.

 

Yig‘ilishda Qo‘ng‘irot soda zavodi, Samarqandkimyo hamda Dehqonobod kaliy zavodidagi loyihalarning amalga oshirilishi tanqidiy ko‘rib chiqilib, muddatlarni tezlashtirish bo‘yicha topshiriqlar berildi.

 

Shuningdek, Ammofos‑Maksam korxonasida to‘plangan fosfogips chiqindilarini qayta ishlash va undan qo‘shimcha mahsulotlar, jumladan sulfat kislotasi ishlab chiqarish imkoniyatlaridan samarali foydalanish masalalari muhokama qilindi.

 

Kimyo sanoatini rivojlantirish doirasida Janubiy Koreya kompaniyalari bilan hamkorlikda kimyo-texnologiya innovatsiya markazini tashkil etish rejalashtirilmoqda. Ushbu markaz gaz va ko‘mir kimyosi, nano va kompozit materiallar, katalizatorlar hamda boshqa yo‘nalishlarda ilmiy tadqiqotlar olib boradigan Markaziy Osiyodagi yetakchi ilmiy platformaga aylanishi kutilmoqda.

 

Bundan tashqari, Farg‘onaazot va Navoiyazot korxonalarida ishlab chiqarish quvvatlarini modernizatsiya qilish, maishiy kimyo mahsulotlari hamda yangi turdagi shinalar ishlab chiqarish loyihalarining borishi haqida ma’lumot berildi.

 

Yig‘ilishda O‘zkimyosanoat tizimida raqamlashtirishni kengaytirish, ERP tizimini joriy etish va sun’iy intellekt texnologiyalaridan foydalanish orqali tarmoq samaradorligini oshirish masalalari ham ko‘rib chiqildi. Energiyani tejash va xarajatlarni optimallashtirish orqali mahsulot tannarxini 10–15 foizgacha kamaytirish vazifasi qo‘yildi.

 

Yakunda davlat rahbari kimyo sanoatidagi yirik investitsiya loyihalarini jadallashtirish, muammoli masalalarni tezkor hal etish hamda yangi ishlab chiqarish quvvatlarini belgilangan muddatlarda ishga tushirish bo‘yicha mutasaddilarga tegishli topshiriqlar berdi.