72 nafar O‘zbekiston fuqarosi AQShdan deportatsiya qilindi
Donald Tramp AQSh prezidenti bo‘lgandan buyon 1000 nafardan ortiq o‘zbekistonlik deportatsiya qilingan.
Bugun Qo‘shma Shtatlar O‘zbekistonga deportatsiya reysini amalga oshirib, mamlakatda qolish uchun qonuniy ruxsatga ega bo‘lmagan 72 nafar O‘zbekiston fuqarosini qaytarib yubordi. Bu haqda AQSHning O‘zbekistondagi elchixonasi ma’lum qildi.
Qayd etilishicha, mazkur parvoz Qo‘shma Shtatlarning o‘z chegaralari xavfsizligini ta’minlash borasidagi sa’y-harakatlari doirasidagi navbatdagi tadbirlardan biri hisoblanadi.
“Prezident Tramp lavozimga kirishganidan buyon Qo‘shma Shtatlar noqonuniy immigratsiyaga chek qo‘yishga hamda o‘z chegaralari va fuqarolarini himoya qilishga qaratilgan o‘z majburiyatlari doirasida 1000 dan ziyod O‘zbekiston fuqarosini deportatsiya qildi”, deyiladi xabarda.
Shuningdek, elchixona Qo‘shma Shtatlar hududiga noqonuniy kirgan shaxslar qamoq jazosiga tortilishini va mamlakatdan chiqarib yuborilishini ta’kidlagan.
Shuningdek, xabarda AQShning deportatsiya tadbirlarini o‘tkazishda yaqindan hamkorlik qilayotgani uchun O‘zbekiston hukumatiga o‘zining chuqur minnatdorligini bildirishi qayd etilgan.
