AQSh Eronga qarshi operatsiyaga kuniga 900 mln dollar sarflamoqda
Oq uy yaqin kunlarda AQSh Kongressidan qo‘shimcha mudofaa byudjeti so‘rashi kutilmoqda.
AQSh tomonidan Eronga qarshi olib borilayotgan harbiy operatsiyalar uchun kuniga taxminan 900 million dollar sarflanmoqda. Bu haqda AQSh Senatidagi ko‘pchilik yetakchisi John Thune ma’lum qildi, deya xabar bermoqda Interfaks.
Uning so‘zlariga ko‘ra, operatsiya katta mablag‘ talab qilayotganiga qaramay, AQSh qo‘shinlari o‘z oldiga qo‘yilgan maqsadlarga erishmoqda.
“Bu sezilarli xarajat, biroq biz yaxshi holatdamiz. Oldimizga qo‘yilgan vazifalar bajarilmoqda. Bu muhim missiya va umid qilamanki, u tez orada yakunlanadi”, — degan Thune.
Avvalroq xalqaro ommaviy axborot vositalari AQSh tomonidan Eronga qarshi dastlabki harbiy zarbalar doirasida o‘q-dorilar uchun 5,6 milliard dollar sarflangani haqida xabar bergan edi.
Shuningdek, Oq uy yaqin kunlarda harbiy operatsiyalarni moliyalashtirish uchun o‘nlab milliard dollarga teng qo‘shimcha mudofaa byudjeti ajratishni so‘rab, AQSh Kongressiga murojaat qilishi kutilmoqda.
