AQSH Isroildan Erondagi neft va energetika obyektlariga zarba bermaslikni so‘radi
So‘rovning sabablaridan biri sifatida Trampning urush tugagandan keyin Venesueladagi kabi Eron neft sektori bilan hamkorlikni yo‘lga qo‘ymoqchiligi keltirilgan.
AQSH Isroildan Eronning energetika obyektlari, ayniqsa neft infratuzilmasiga zarbalarni to‘xtatishni “yuqori siyosiy darajada” so‘radi. Bu haqda so‘rovdan xabardor uchta manbaga tayanib Axios ma’lumot berdi.
7-mart kuni Isroil havo kuchlari Tehron va qo‘shni Karaj shahridagi neft omborlariga zarbalar berdi. Natijada Eron poytaxtida neft bazalaridagi yong‘inlar natijasida hosil bo‘lgan ifloslantiruvchi zarrachalar sabab “qora yomg‘ir” kuzatildi.
Isroil rasmiylaridan biriga ko‘ra, AQSH Eronning neft obyektlariga rejalashtirilayotgan har qanday zarba haqida oldindan ogohlantirishni so‘ragan. Prezident Donald Tramp ma’muriyati Isroil bunday zarbalarni to‘xtatishi kerakligining uchta sababini keltirgan.
Birinchidan, ular asosiy qismi Eron hukumatiga qarshi bo‘lgan fuqarolarga ham zarar yetkazadi; ikkinchidan, Tramp Venesueladagi kabi urush tugaganidan keyin Eron neft sektori bilan hamkorlikni yo‘lga qo‘ymoqchi; uchinchidan, bunday o‘qqa tutishlar Tehronning Fors ko‘rfazi mamlakatlaridagi energetika infratuzilmasiga keng ko‘lamli javob hujumlarini keltirib chiqarishi mumkin.
Axios'ning yozishicha, bu Eronga qarshi urush boshlanganidan beri AQSHning Isroil harbiy harakatlarini birinchi marta cheklashi hisoblanadi
“Trampning iltimosi yuqori siyosiy darajada, shuningdek, alohida Isroil armiyasi bosh shtabi boshlig‘i Eyal Zamirga yetkazildi”, dedi Isroil rasmiylaridan biri.
Tramp Eron energetika va neft obyektlariga zarba berishni “oxirgi choralar” ssenariysi sifatida ko‘rib chiqmoqda. Agar Eron birinchi bo‘lib AQSH ittifoqchisi bo‘lgan arab davlatlarining neft infratuzilmasiga hujum qilsa, javob zarbalari beriladi.
Shu bilan biraga AQSH Eron neft obyektlariga yangi zarbalar seriyasi jahon xomashyo narxining yanada oshishiga olib kelishidan xavotirda.
