Farg‘onada hujra tashkil qilib, bolalarga diniy ta'lim berayotgan shaxs ushlandi
Hujrada 6–14 yoshdagi 17 nafar bola noqonuniy tarzda ta’lim olayotgani aniqlangan.
Farg‘ona viloyatida noqonuniy diniy ta’lim berilgan yashirin hujra faoliyati aniqlanib, uni tashkil etgan shaxs qo‘lga olindi. Bu haqda Farg‘ona viloyati Ichki ishlar boshqarmasi matbuot xizmati xabar berdi.
Ma’lum qilinishicha, Davlat xavfsizlik xizmati hamda ichki ishlar organlari xodimlari hamkorligida o‘tkazilgan tezkor tadbir davomida noqonuniy diniy ta’lim berish bilan bog‘liq holat fosh etilgan.
Tekshiruvlar davomida yashirin hujrada 6 yoshdan 14 yoshgacha bo‘lgan 17 nafar bola ta’lim olayotgani aniqlangan. Bolalarning 14 nafari Qo‘qon shahridan, qolganlari esa respublikaning boshqa hududlaridan kelgani ma’lum bo‘lgan.
Shuningdek, ota-onalar farzandlarini ushbu hujrada o‘qitish uchun tashkilotchiga oyiga 100–150 AQSH dollari miqdorida to‘lov qilib kelgani aniqlangan.
Hozirda mazkur holat yuzasidan fuqaro ga nisbatan O‘zbekiston Respublikasi Jinoyat kodeksining 229-2-moddasi asosida hujjatlar rasmiylashtirilib, surishtiruv ishlari olib borilmoqda.
