Isroilda raketa hujumi oqibatida 62 yoshli o‘zbekistonlik erkak halok bo‘ldi
U so‘nggi 14 yil davomida Isroilda yashab kelgan va ushbu davlat fuqarosi hisoblangan.
Isroilning Yehud shahrida joriy yilning 9-mart kuni sodir bo‘lgan raketa hujumi natijasida 62 yoshli o‘zbekistonlik erkak halok bo‘ldi. Bu haqda O‘zbekistonning Isroildagi elchixonasi xabar berdi.
Marhum R.G‘. O‘zbekistonda tug‘ilib voyaga yetgan va 2017-yilda O‘zbekiston fuqaroligidan chiqqan. U so‘nggi 14 yil davomida Isroilda yashab kelgan va ushbu davlat fuqarosi hisoblangan. Elchixona marhumning oila a’zolari va yaqinlariga chuqur hamdardlik bildirdi.
11-mart holatiga ko‘ra, Isroilda bo‘lgan boshqa o‘zbekistonliklar orasida jarohat olganlar haqida elchixonaga xabar kelmagan.
Elchixona Isroil hududida vaziyat keskinligicha saqlanib qolayotganini inobatga olib, mamlakatda vaqtincha mehnat faoliyatini olib borayotgan yoki doimiy yashab kelayotgan barcha vatandoshlarni ogohlantirish signallariga jiddiy munosabatda bo‘lishga, xavfsizlik talab va qoidalariga qat’iy rioya qilishga chaqirdi.
