Mintaqadagi davlatlar Eronning dushmani emas — Qatar tashqi ishlar vaziri
Vazir Muhammad bin Abdulaziz al-Xulayfiy Eron va Qo‘shma Shtatlarni vositachilik yo‘li bilan yechim topish uchun muzokaralar stoliga qaytishga chaqirdi.
Qatar tashqi ishlar vaziri Muhammad bin Abdulaziz al-Xulayfiy Yaqin Sharqdagi harbiy keskinlikni kamaytirishga chaqirdi hamda Eron va AQSHni vositachilik orqali yechim topish uchun muzokaralar stoliga qaytishga undadi. Bu haqda Al Jazeera xabar berdi.
Vazir Al Jazeera’ga bergan maxsus intervyusida Eronning qo‘shni davlatlarga qilayotgan hujumlari “hech kimga foyda keltirmasligini” ta’kidladi.
Eron AQSH va Isroil tomonidan qariyb ikki hafta davom etgan bombardimonlarga javoban Fors ko‘rfazi mintaqasidagi qo‘shni davlatlarga va undan tashqariga raketa hamda dronlar uchirdi. Bu hujumlar insonlar halok bo‘lishiga, muhim infratuzilmalarga zarar yetishiga sabab bo‘lib, mintaqaning energetikaga tayanadigan iqtisodiyotiga jiddiy ta’sir qildi.
Al-Xulayfiy Qatar kengayib borayotgan hujumlar, jumladan fuqarolik infratuzilmasiga qilingan zarbalar sabab “nihoyatda xavotirda” ekanini aytdi.
“Hozirgi vaziyat juda achinarli. Barqaror va uzoq muddatli yechimga erishishning yagona yo‘li muzokaralar stoliga qaytishdir”, — dedi vazir.
Shuningdek, Al- Xulayfiy Qatar suverenitetiga to‘g‘ridan to‘g‘ri ta’sir ko‘rsatayotgan “asossiz va dahshatli hujumlar qat’iy qoralanishini bildirdi.
Vazirning aytishicha, Doha ushbu tajovuzga qarshi o‘zini himoya qilish huquqidan foydalanib “barcha mumkin bo‘lgan va qonuniy choralarni” ko‘rishda davom etadi.
Al-Xulayfiyning ta’kidlashicha, mazkur mojaro Fors ko‘rfazining energiya ta’minoti zanjiri Ho‘rmuz bo‘g‘ozi orqali uzluksiz o‘tishini ta’minlash uchun “global yechim”ni talab qiladi. Chunki bu yerdagi xalqaro qatnov mojaro tufayli jiddiy izdan chiqqan.
Shuningde, vazir hozirda Eron Qatar va O‘monga ham hujum qilayotgani tufayli bu ikki mamlakat vositachi vazifasini bajara olmasligi qayd etdi.
“Eronning dushmani mintaqadagi mamlakatlar emas, Tehron buni tushunmayapti”, — deya qo‘shimcha qildi vazir.
Shu bilan birga Qatar tashqi ishlar vaziri Doha AQShni ham harbiy harakatlarni to‘xtatishga undaganini ma’lum qildi.
