Platforma yaratish uchun o‘tkazilgan tenderda qatnashgan kompaniyalar bir shaxsga tegishli bo‘lib chiqdi
Nogironligi bo‘lgan shaxslarga tibbiy-ijtimoiy yordam ko‘rsatish platformasini yaratish jarayonida shubhali davlat xaridi o‘rganildi.
OAV va ijtimoiy tarmoqlardagi tarqalgan xabarlar asosida, PF-87-son Prezident farmoniga muvofiq, nogironligi bo‘lgan shaxslarga tibbiy-ijtimoiy yordam ko‘rsatish masalalari yuzasidan davlat organlariga onlayn murojaat qilish platformasini yaratish jarayoni Korrupsiyaga qarshi kurashish agentligi tomonidan o‘rganilgani ma'lum qilindi.
Ma’lum qilinishicha, topshiriq ijrosiga mas’ul Tibbiy-ijtimoiy xizmatlarni rivojlantirish agentligi bo‘lib, platformani ishlab chiqish bo‘yicha 2022-yil 14-noyabrda boshlang‘ich narxi 737 mln so‘mlik tanlov o‘tkazilgan.
Davlat xaridida “E.” MChJ 710 mln so‘mlik taklif bilan g‘olib chiqgan, yagona raqib sifatida ishtirok etgan “I.” MChJ esa zaxira g‘olib deb topilgan. O‘rganish davomida mazkur ikki talabgor hujjatlari bir xil qurilma va IP-manzildan yuklangani aniqlangan.
Shuningdek, platformaning App Storedagi mobil ilovasining ishlab chiqaruvchisi sifatida “I.U” jamoat birlashmasi qayd etilgan bo‘lib, birlashma ta’sischisi B.S.S. zaxira g‘olib “I.” MChJning yagona rahbari va ta’sischisi ekanligi ma’lum bo‘lgan.
Bundan tashqari, buyurtmachi 710 mln so‘m mablag‘ni “E.” MChJga to‘lab bergan, lekin u joriy xarajat sifatida hisobga olingan va platformani balansga qabul qilish chorasi ko‘rilmagan.
Yuqoridagi holatlar bo‘yicha to‘plangan hujjatlar huquqni muhofaza qiluvchi organlarga qonuniy choralar ko‘rish maqsadida yuborildi.
