Qirg‘izistonga yashirincha olib ketilayotgan 2,1 mlrd so‘mlik oltin quymalar to‘xtatib qolindi
Oltin quymalarni mashinaning kuzov qismiga yashirib, olib o‘tishmoqchi bo‘lgan.
Farg‘ona viloyatida oltin quymalarning noqonuniy ravishda Qirg‘izistonga olib chiqilishining oldi olindi. Bu haqda Davlat xavfsizlik xizmati Zamon.uz'ga xabar berdi.
Ma’lum qilinishicha, tezkor tadbir davomida Farg‘ona tumanida yashovchi fuqaro boshqaruvidagi Damas rusumli avtomobil Qirg‘izistonga chiqish maqsadida “Vodil-avto” chegara bojxona postiga kirib kelgan vaqtda tekshiruvdan o‘tkazilgan.
Tekshiruv natijasida avtomobil kuzov qismi ichiga yashirilgan 4 dona nostandart shakldagi oltin quyma borligi aniqlanib, ular ashyoviy dalil sifatida rasmiylashtirib olingan.
Ekspertiza xulosasiga ko‘ra, oltin quymalarning sof og‘irligi 1 kilogramm 232 gramm bo‘lib, umumiy qiymati 2 mlrd 182 mln 466 ming so‘mni tashkil etadi.
Mazkur holat yuzasidan ushbu shaxsga nisbatan Jinoyat kodeksining 182-moddasi (bojxona to‘g‘risidagi qonunchilikni buzish) 2-qismi “a” bandi bilan jinoyat ishi qo‘zg‘atilib, tergov harakatlari olib borilmoqda.
