Sirdaryoda kadastr xodimi 1500 dollar pora bilan qo'lga tushdi
U fuqaroning kadastr hujjatlarini rasmiylashtirish va muddatidan oldin tayyorlab berish evaziga pul talab qilgan.
Kadastr agentligining Sirdaryo viloyati Mirzaobod tumani bo‘limi bosh inspektoriga nisbatan jinoyat ishi qo‘zg‘atildi. Bu haqda DXX Zamon.uzga xabar berdi.
Ma’lum qilinishicha, mansabdor shaxs xizmat mavqeidan foydalangan holda 1975-yilda tug‘ilgan fuqaroning ishonchiga kirib, uning yashash uyi bo‘yicha kadastr hujjatlarini rasmiylashtirib berish hamda ularni muddatidan oldin tayyorlab berishni va’da qilgan. Buning evaziga u 1500 AQSH dollari talab qilgan.
Davlat xavfsizlik xizmati hamda Bosh prokuratura huzuridagi Iqtisodiy jinoyatlarga qarshi kurashish departamenti xodimlari hamkorligida o‘tkazilgan tezkor tadbir davomida bosh inspektor 1000 AQSH dollari va 6 million 50 ming so‘m pul mablag‘ini olayotgan vaqtida ashyoviy dalillar bilan ushlangan.
Mazkur holat yuzasidan unga nisbatan Jinoyat kodeksining 168-moddasi 3-qismi “v” bandi hamda 28,211-moddasi 1-qismi bilan jinoyat ishi qo‘zg‘atilib, gumonlanuvchiga nisbatan qamoq ehtiyot chorasi qo‘llanilgan.
Hozirda mazkur holat yuzasidan tergov harakatlari davom etmoqda.
