"Tashabbusli budjet”dagi qoidabuzarliklar sabab 10 ta tuman va shahar ovoz berish bosqichidan chetlatildi
Mazkur hududlardagi ishchi komissiyalar loyihalarni amaldagi mezonlar asosida qayta ko‘rib chiqmaguncha cheklov saqlanib qoladi.
11-martdan “Tashabbusli budjet” loyihalari uchun ovoz berish bosqichi boshlandi. Biroq ayrim hududlarda saralash jarayonida yo‘l qo‘yilgan qoidabuzarliklar sabab 7 ta tuman va 3 ta shahar ushbu bosqichda vaqtincha ishtirok eta olmaydi. Bu haqda O‘zbekiston Respublikasi Iqtisodiyot va moliya vazirligi ma’lum qildi.
Vazirlik ma’lumotiga ko‘ra, “Tashabbusli budjet”ning 2026-yil birinchi mavsumi doirasida fuqarolardan jami 21 049 ta loyiha kelib tushgan. Shundan 17 390 tasi saralash bosqichidan o‘tib, ovoz berish bosqichiga chiqarilgan.
Ammo Xorazm viloyatining Urganch shahri, Bog‘ot, Qo‘shko‘pir, Urganch, Xiva, Yangiarik tumanlari, Toshkent viloyatining Zangiota tumani, shuningdek Farg‘ona shahri, hamda Navoiy viloyatining G‘ozg‘on va Navoiy shaharlarida ayrim loyihalar ishchi komissiyalar tomonidan asossiz rad etilgani yoki mezonlarga mos kelmaydigan loyihalar ovoz berishga bosqichiga chiqarilgani aniqlangan.
Qayd etilishicha, vazirlik ushbu holatlar yuzasidan loyihalarni qonunchilikda belgilangan mezonlar asosida qayta ko‘rib chiqish bo‘yicha so‘rov yuborgan. Biroq tegishli hududlardagi ishchi komissiyalar tomonidan loyihalar qayta ko‘rib chiqilmagan.
Shu sababli, loyihalar amaldagi mezonlarga muvofiq qayta ko‘rib chiqilgunga qadar ushbu tuman va shaharlarda ovoz berish jarayoni vaqtincha cheklanadi.
Ma’lumotlarga ko‘ra, ovoz berish bosqichi 20-mart soat 23:59 gacha davom etadi.
Shuningdek, joriy mavsumdan boshlab “Tashabbusli budjet”da sheriklik mexanizmi ham joriy etildi. Unga ko‘ra, agar loyiha uchun zarur mablag‘ning yarmi tashabbuskorlar tomonidan yig‘ilsa, loyiha ovoz berish bosqichisiz avtomatik ravishda g‘olib deb topiladi.
Ilk mavsumda 16 ta loyiha shu tartibda g‘olib bo‘lgan. Ularni moliyalashtirish uchun fuqarolar tomonidan jami 3,3 mlrd so‘m mablag‘ to‘plangan.
Mazkur loyihalarning 7 tasi Qashqadaryo viloyatiga to‘g‘ri keladi. Ba’zi loyihalar avvalgi mavsumlarda ketma-ket g‘olib bo‘lgani sabab tanaffusga tushgan mahallalar tomonidan sheriklik asosida yana ilgari surilgan.
