Tehron Bayrutda to‘rt nafar eronlik diplomatning o‘ldirilganini terrorchilik harakati sifatida baholadi
Isroil harbiylari Bayrutdagi mehmonxonada eronlik agentlarning maxfiy uchrashuvi bo‘lib o‘tayotganidan xabardor bo‘lgan.
Eronning BMTdagi elchisi Amir Said Iravoniy o‘tgan yakshanba kuni Bayrutdagi “Ramada” mehmonxonasiga berilgan zarba natijasida to‘rt nafar eronlik diplomat halok bo‘lganida Isroilni rasman aybladi. Bu haqda BBC xabar bermoqda.
Iravoniy BMT bosh kotibi Antonio Guterrishga yo‘llagan maktubida hujum diplomatlar o‘z rasmiy qarorgohlaridan mehmonxonaga ko‘chib o‘tganidan keyin amalga oshirilgan “qasddan va nishonga olingan hujum” bo‘lganini ta’kidlagan.
“Boshqa suveren davlat hududida xizmat qilayotgan suveren davlat vakillari bo‘lgan to‘rt nafar eronlik diplomatning nishonga olinib o‘ldirilishi jiddiy terrorchilik harakati hamda xalqaro huquqning qo‘pol buzilishi hisoblanadi”, deyiladi maktubda.
Zarba Bayrut markazidagi mehmonxonaning to‘rtinchi qavatiga berilgan. Isroil harbiylari esa binoda eronlik agentlarning maxfiy uchrashuvi bo‘lib o‘tayotganidan xabardor bo‘lgan.
Isroil Mudofaa kuchlari ma’lumotiga ko‘ra, zarba oqibatida halok bo‘lgan besh kishi Eron Islom inqilobi qo‘riqchilari korpusining xorijdagi operatsiyalarni amalga oshiruvchi elit bo‘linmasi — “Quds” kuchlarida ishlagan.
Livan Sog‘liqni saqlash vazirligining dastlabki ma’lumotlariga ko‘ra, zarba natijasida 4 kishi halok bo‘lgan, 10 kishi jarohatlangan, biroq ularning ismlari hozircha ochiqlanmagan.
