Toshkent viloyatida narkotik moddalarni sotishga uringan shaxslar hibsga olindi
Operatsiyalar natijasida 1 kg “gashish” va 1883 dona kuchli ta’sir qiluvchi preparat musodara qilindi.
Bojxona qo‘mitasi Kontrabandaga qarshi kurash departamenti xodimlari Davlat xavfsizlik xizmati vakillari bilan hamkorlikda Toshkent viloyatida giyohvand moddalar va kuchli ta’sir qiluvchi preparatlarning noqonuniy savdosiga qarshi bir qator tezkor operatsiyalar o‘tkazdi. Ushbu tadbirlar natijasida narkotik moddalarni sotishga uringan bir necha shaxs qo‘lga olindi va ulardan katta miqdorda modda musodara qilindi.
Yangiyo‘l tumanida oldindan kuzatuvga olingan fuqaro xaridorga 1 kg 12 gramm “gashish” giyohvandlik moddasini 13 000 AQSh dollariga sotishni kelishib olgan. Huquqni muhofaza qiluvchi organlar tomonidan shaxs mahalliy mehmonxonada 1000 dollar oldindan to‘lov olayotgan paytda hibsga olingan. Tadbir davomida giyohvand moddaning to‘liq miqdori dalil sifatida musodara qilingan.
Boshqa bir holatda, Ohangaron shahrida Bojxona va DXX xodimlari tomonidan “Spark” rusumli avtomobil to‘xtatilib, guvohlar ishtirokida ko‘zdan kechirilgan. Yuk xonani tekshirish jarayonida avtomobilning ovoz tizimi ichida 841 dona “Zardeks” va 1042 dona “Regapen” nomli kuchli ta’sir qiluvchi dorilar topilgan.
Tergov natijasida ushbu dorilar avtomashinadagi uch yo‘lovchiga tegishli ekani va ular dorilarni Ohangaronda sotish maqsadida olib ketayotganligi aniqlangan.
Hozirda ikkala holat bo‘yicha jinoyat ishlari qo‘zg‘atilgan va butun ta’minot zanjirini aniqlash hamda huquqiy baholash uchun tergov harakatlari davom etmoqda.
