Xitoy Tojikiston–Afgʻoniston chegarasida 9 ta chegara inshooti quradi

Xitoy hukumati Tojikiston va Afgʻoniston chegarasi hududida toʻqqizta chegara inshooti qurishni rejalashtirmoqda. Bu haqda Asia Plus nashri xabar berdi.

 

Mazkur kelishuv loyihasi 4-mart kuni Tojikiston parlamenti yig‘ilishida ko‘rib chiqilib, tasdiqlandi.

 

Ma’lum qilinishicha, loyiha Tojikiston chegara qo‘shinlarining moddiy-texnik bazasini mustahkamlashga qaratilgan. Qurilish ishlari uch bosqichda amalga oshiriladi.

 

Tojikiston Milliy xavfsizlik davlat qoʻmitasi (MXDQ) raisining birinchi oʻrinbosari Murodali Rajabzoda parlament majlisida ma’lum qilishicha, loyihaning ikkinchi bosqichi bo‘yicha almashinuv xatlari allaqachon imzolangan.

 

Unga ko‘ra, quriladigan chegara inshootlarining umumiy maydoni 17 109 kvadrat metrni tashkil etadi. Qurilish xarajatlari taxminan 569 million somoniy (424 million 830 ming Xitoy yuani)ni tashkil etib, ushbu mablag‘ Xitoy hukumati tomonidan qoplanadi.

 

Kelishuvga muvofiq, Tojikiston tomoni loyiha doirasidagi qurilish ishlarini soliqlar, bojxona to‘lovlari va boshqa majburiy yig‘imlardan ozod qilish uchun mas’ul bo‘ladi.

 

Hozircha mazkur chegara inshootlari aynan qaysi hududlarda barpo etilishi va ularning turi qanday bo‘lishi haqida rasmiy ma’lumot berilmagan.