Afg‘onistonda kamida 12 ta sudsiz qatl holati qayd etilgan — BMT
Shuningdek, 29 ta o‘zboshimchalik bilan hibsga olish va 6 ta qiynoq holati hujjatlashtirilgan.
Birlashgan Millatlar Tashkiloti tomonidan e’lon qilingan yangi choraklik hisobotda Afg‘onistonda inson huquqlari bilan bog‘liq qator jiddiy holatlar qayd etilgani ma’lum qilindi. Bu haqda Tolo news nashri xabar berdi.
Hisobotga ko‘ra, 6-noyabrdan 25-yanvargacha bo‘lgan davrda mamlakatda sobiq hukumat amaldorlari hamda xavfsizlik kuchlari vakillariga nisbatan kamida 12 ta sudsiz qatl holati aniqlangan. Ushbu voqealarda Tolibon vakillari bilan bir qatorda noma’lum shaxslar ham ishtirok etgani qayd etilgan.
Shuningdek, BMT mutaxassislari tomonidan 29 ta o‘zboshimchalik bilan hibsga olish va 6 ta qiynoq hamda yomon muomala holati hujjatlashtirilgan.
Hisobotda ayrim jabrlangan shaxslar mamlakatga qaytganidan so‘ng hujumga uchragani ham alohida ta’kidlangan. Bunday holatlar Tolibon tomonidan ilgari e’lon qilingan “umumiy amnistiya” siyosatiga qaramay davom etayotgani qayd etilib, bu sobiq hukumat vakillari xavfsizligi va huquqiy himoyasi borasida jiddiy xavotirlarni yuzaga keltirmoqda.
Inson huquqlari tashkilotlari ushbu holatlar yuzasidan shaffof va mustaqil tergov o‘tkazish, shuningdek, aybdorlarni javobgarlikka tortish zarurligini ta’kidlamoqda.
