AQSh Green Card lotereyasi qoidalarini o‘zgartirishni rejalashtirmoqda
O‘zgarishlar 2026-yil 10-apreldan kuchga kirishi va DV-2027 lotereyasiga ta’sir qilishi kutilmoqda.
AQSh hukumati Green Card (DV) lotereyasida ishtirok etish tartibiga o‘zgartirishlar kiritishni rejalashtirmoqda. Bu haqda Federal Register nashri xabar berdi.
Ma’lum qilinishicha, yangi qoidalar 2026-yil 10-apreldan kuchga kirishi mumkin va ular DV-2027 lotereyasidan boshlab amal qiladi.
Taklif etilayotgan o‘zgarishlarga ko‘ra, lotereyada qatnashish uchun ariza topshirayotgan shaxs amal qilayotgan pasportga ega bo‘lishi shart bo‘ladi. Ariza topshirish jarayonida pasportning shaxsiy ma’lumotlar hamda imzo joylashgan sahifasining skanerlangan nusxasi ham ilova qilinishi kerak bo‘ladi.
Shuningdek, arizani to‘ldirish uchun ajratilgan vaqtni 30 daqiqadan 90 daqiqagacha uzaytirish rejalashtirilmoqda.
AQSh davlat departamenti mazkur choralar firibgarlik arizalari sonini kamaytirish va lotereya jarayonining shaffofligini oshirishga xizmat qilishini ta’kidlamoqda.
Eslatib o‘tamiz, o‘tgan yil sentabr oyida AQSh Davlat departamenti Diversity Visa (DV) lotereyasida ro‘yxatdan o‘tish uchun 1 dollar miqdorida to‘lov joriy etilishi mumkinligini ham ma’lum qilgan edi.
