AQSHning keyingi nishoni Rossiya bo‘ladi — Rossiya Kommunistik partiyasi raisi
Deputatning aytishicha, Fors ko‘rfazida sodir bo‘layotgan voqealar Amerika imperializmining niqoblari olib tashlanganini ko‘rsatmoqda.
Rossiya Kommunistik partiyasi raisi Gennady Zyuganov AQSHning Yaqin Sharqdagi harakatlarini “tajovuz, zo‘ravonlik va prinsipsizlik”, deb baholadi. Zyuganov bu haqda Davlat dumasi yig‘ilishida ma’lum qildi.
Uning aytishicha, Yaqin Sharqdagi urush Tramp strategiyasining bir qismi bo‘lib Erondan keyingi nishon Rossiya bo‘ladi.
“Omon qolish uchun kurashga kelsak, hozir Eron jang qilmoqda. Keyingisi biz bo‘lamiz. Trampning strategiyasiga qarang: birinchi o‘rinda Xitoy, ikkinchi o‘rinda biz, uchinchi o‘rinda Eron”, — dedi Zyuganov.
Deputatning so‘zlariga ko‘ra, Fors ko‘rfazida sodir bo‘layotgan voqealar “Amerika imperializmining niqoblari olib tashlanganini” ko‘rsatmoqda.
“Tezkor harbiy hujum rejasi muvaffaqiyatsizlikka uchradi. Ular eronliklar tezda qo‘llarini ko‘taradi va o‘z shartlarimizni diktovka qilamiz deb umid qilishgandi. Hech biri o‘xshamayapti”, — dedi u.
Zyuganov urushning mintaqa uchun og‘ir oqibatlariga to‘xtalib, jangovar harakatlar suvni chuchuklashtirish qurilmalari va infratuzilmalarning shikastlanishi tufayli suv va oziq-ovqat bilan bog‘liq muammolarga olib kelganini qayd etdi.
