Bekobodda 11-sinf o‘quvchisining o‘limi yuzasidan 5 kishi qamoqqa olindi
Jabrlanuvchi pichoqlanish oqibatida vafot etgan.
Bekobod shahrida janjal oqibatida qotillik yuz bergani yuzasidan 5 nafar voyaga yetmagan shaxs qamoqqa olindi. Bu haqda Bosh prokuratura xabar berdi.
Ma’lum qilinishicha, 5-mart kuni Bekobod shahrida bir necha voyaga yetmagan shaxslar o‘rtasida kelib chiqqan og‘zaki janjal davomida ulardan biri oshxona pichog‘i bilan jabrlanuvchining o‘ng va chap ko‘krak qismlariga jarohat yetkazgan.
Jabrlanuvchi tibbiyot muassasasiga olib borilgan bo‘lsa-da, ko‘rsatilgan tibbiy yordamga qaramasdan vafot etgan.
Mazkur holat yuzasidan Jinoyat kodeksining 97-moddasi (Qasddan odam o‘ldirish) bilan jinoyat ishi qo‘zg‘atilib, voyaga yetmagan 5 nafar gumonlanuvchi shaxsga nisbatan "qamoqqa olish" ehtiyot chorasi qo‘llanilgan.
Tergov harakatlari davom etmoqda.
