Elektr energiyasidan foydalanish qoidalarini buzganlik uchun jazo choralari kuchaytiriladi

O‘zbekistonda 11- mart kuni imzolangan qonunga muvofiq, Jinoyat kodeksi hamda Ma’muriy javobgarlik to‘g‘risidagi kodeksga o‘zgartirish va qo‘shimchalar kiritildi.

 

Qonun rasmiy e’lon qilingan kundan e’tiboran 3 oy o‘tgach kuchga kiradi.

 

Ma’muriy javobgarlik to‘g‘risidagi kodeksga kiritilgan o‘zgartirishlarga ko‘ra, umumiy foydalanishdagi elektr, issiqlik, gaz tarmoqlariga o‘zboshimchalik bilan ulanish yoki ulardan foydalanish qoidalarini boshqacha tarzda buzish,

 

— jismoniy shaxslarga BHMning 15 baravaridan 20 baravarigacha (6 mln 180 ming so‘mdan 8 mln 240 ming so‘mgacha), 

 

— mansabdor shaxslarga esa – 25 baravaridan 30 baravarigacha (10 mln 300 ming so‘mdan 12 mln 360 ming so‘mgacha) miqdorda jarima solishga sabab bo‘lishi belgilandi.

 

Shuningdek, amaldagi tahrirda fuqarolarga BHMning 10 baravaridan 15 baravarigacha, mansabdor shaxslarga esa – 20 baravaridan 25 baravarigacha miqdorda jarima solinishi belgilangan.

 

Umumiy foydalanishdagi elektr, issiqlik, gaz yoki vodoprovod tarmoqlariga tijorat maqsadlarida o‘zboshimchalik bilan ulanish BHMning 15 baravaridan 25 baravarigacha (6 mln 180 ming so‘mdan 8 mln 240 ming so‘mgacha) jarima yoki 15 sutkagacha muddatga ma’muriy qamoqqa olishga sabab bo‘lishi belgilandi.

 

Amaldagi tahrirda mazkur qoidabuzarlilar uchun jarima miqdori BHMning 10 baravaridan 20 baravarigacha miqdorda belgilangan.

 

Jinoyat kodeksiga kiritilgan o‘zgartirishlarga muvofiq, umumiy foydalanishdagi elektr, issiqlik, gaz yoki vodoprovod tarmoqlariga o‘zboshimchalik bilan ulanish, shunday harakat uchun ma’muriy jazo qo‘llanilganidan keyin sodir etganlik BHMning 30 baravaridan 75 baravarigacha (12 mln 360 ming so‘mdan 28 mln 840 ming so‘mgacha) miqdorda jarima yoki 240 soatgacha majburiy jamoat ishlari yoki bir yilgacha axloq tuzatish ishlari bilan jazolanishi belgilandi.

 

Amaldagi tahrirda jarimaning eng kam miqdori BHMning 25 baravari etib belgilangan.