Erdog'an Yaqin Sharqdagi urushni to'xtatishga chaqirdi
Turkiya prezidentining ta’kidlashicha, Erondagi mojaroning kuchayishi butun mintaqada vaziyatning keskinlashishiga olib kelishi mumkin.
Rajap Tayyip Erdog‘an mintaqada keskinlashib borayotgan vaziyat fonida AQSh-Isroil va Eron o‘rtasidagi harbiy qarama-qarshilik keng ko‘lamli urushga aylanishidan oldin uni to‘xtatishga chaqirdi.
Prezident Anqarada partiyasining parlament guruhi yig‘ilishida so‘zga chiqib, diplomatik yo‘l bilan mojaroning oldini olish “to‘liq mumkin” ekanini ta’kidlagan. Uning aytishicha, Turkiya vaziyatni barqarorlashtirish maqsadida muzokaralarni qayta tiklash va diplomatik jarayonni faollashtirish bo‘yicha sa’y-harakatlarni davom ettirmoqda.
Davlat rahbari mintaqadagi vaziyat nihoyatda nozik ekanini qayd etib, Turkiya ushbu sharoitda ehtiyotkorona siyosat yuritayotganini hamda ehtimoliy xavflardan himoyalanish uchun zarur choralarni ko‘rayotganini bildirgan.
Shuningdek, u Turkiya mintaqadagi inqirozlarga befarq emasligini va og‘ir vaziyatlarda do‘st hamda qardosh davlatlarni qo‘llab-quvvatlashda davom etishini ta’kidlagan.
Prezidentning so‘zlariga ko‘ra, Anqara mintaqada yuzaga kelishi mumkin bo‘lgan mazhablararo nizolar va keskinliklarni kuchaytirishga qaratilgan urinishlarga qarshi qat’iy choralar ko‘rmoqda. Nutqi davomida Erdog'an musulmon dunyosida birlik zarurligini ta’kidlab, dinni mazhab yoki etnik kelib chiqish asosida ajratishga qarshi ekanini bildirgan.
