Eron prezidenti mojaroni tugatish uchun AQSh va Isroildan tovon puli talab qildi
Shuningdek, Eronning qonuniy huquqlari tan olinishi va xalqaro xavfsizlik kafolatlari berilishi kerak.
Mas’ud Pezeshkian mojaroni tugatish uchun AQSh va Isroildan tovon puli to‘lash hamda kelajakdagi harbiy tajovuzlarning oldini olish bo‘yicha qat’iy xalqaro kafolatlar berilishini talab qildi.
Eron prezidenti bu talablarni mojaroning yakunlanishi uchun “yagona yo‘l” deb atadi.
Pezeshkian ijtimoiy tarmoqlardagi sahifasida Rossiya va Pokistan rahbarlari bilan o‘tkazgan suhbatlari davomida ham Tehronning mintaqada tinchlikni qo‘llab-quvvatlash pozitsiyasini yana bir bor tasdiqlaganini ma’lum qilgan.
Prezidentning fikricha, Isroil va AQSh tomonidan boshlangan harbiy to‘qnashuvni yakunlash uchun quyidagi shartlar bajarilishi kerak:
Eronning qonuniy huquqlarini tan olish;
mamlakatga yetkazilgan zarar uchun tovon puli to‘lash;
kelajakda harbiy tajovuzlarning oldini olish bo‘yicha xalqaro kafolatlar berish.
Shuningdek, Tehron Vashingtondan Eronning yadroviy energetika sohasidagi huquqlarini tan olishni, jumladan, mamlakat hududidagi yadroviy obyektlarda to‘liq yadroviy yoqilg‘i siklini amalga oshirish imkoniyatini tasdiqlashni ham talab qilmoqda.
