Eron rejimi qulash xavfi ostida emas — AQSh razvedkasi
Eron rejimining barqarorligi saqlansa, urush AQSh xohlagandek yakunlanmasligi mumkin.
Reuters agentligining manbalarga tayanib xabar berishicha, AQSh razvedkasi Eron rahbariyatida barqarorlik saqlangani tufayli deyarli ikki hafta davomida AQSh hamda Isroil tomonidan uzluksiz amalga oshirilgan bombardimonlardan keyin ham mamlakatda amaldagi rejim saqlanib qolishini bildirgan.
Agentlik suhbatdoshlari ma’lumotlariga ko‘ra, ko‘plab razvedka hisobotlarida rejim qulash xavfi ostida emasligiga dalillar keltirilgan.
Neft narxining tez o‘sishi sababli siyosiy bosim kuchaygan bir paytda, AQSh prezidenti Donald Tramp ushbu hafta "2003 yildan beri eng yirik harbiy operatsiyani juda tez orada yakunlaymiz", deb bayonot bergan edi.
Agentlikning yozishicha, Eron yetakchilari barqaror qolaversa, urushni maqbul tarzda yakunlash qiyin bo‘lishi mumkin.
Shuningdek, razvedka xabarlarida, 28 fevralda, AQSh va Isroil zarbalari boshlanganining birinchi kuni Eron oliy yetakchisi Ali Xomanaiy vafot etganiga qaramay, Eron diniy rahbariyatining birdamligi alohida ta’kidlangan.
Yopiq muzokaralarda qatnashgan Isroil rasmiylari ham urush diniy hukumatning qulashiga olib kelishiga aniq ishonch yo‘qligini tasdiqlashgan.
