Eron va "Hizbulloh" Isroilga 150 dan ortiq raketa uchirdi

"Hizbulloh" guruhi va Isroil Mudofaa armiyasi bir-biriga raketa zarbalari berdi. Eron ham "Hizbulloh" bilan qo‘shma operatsiya o‘tkazayotganini aytib, Isroil tomon raketalar uchirdi. Bu haqda Deutsche Welle xabar berdi.

 

11-mart kuni kechqurun Isroil shimoli va markazidagi shaharlar "Hizbulloh" harakati tomonidan ommaviy raketa hujumiga uchradi. Isroil Mudofaa armiyasi hujumlar davomida 150 ga yaqin raketa uchirilganini va hujumlar qaytarilganini ma’lum qildi. 

 

Ma’lum qilinishicha, raketa hujumlari soat 20:00 atrofida boshlangan. Isroilning shimoliy va markaziy qismida havo trevogasi rejimi e’lon qilindi. Hayfada ham hudud bo‘ylab dronlar uchirilishi haqida ogohlantiruvchi sirenalar yangradi. Dastlabki ma’lumotlarga ko‘ra, hujum oqibatida kamida ikki kishi jarohatlangan.

 

“Hizbulloh” hujum Isroilning harbiy obyektlariga va mamlakatning Livan bilan chegarasidan besh kilometr uzoqlikdagi aholi punktlariga qaratilganini ta’kidladi. Guruh nishonga olingan hududlardagi aholini evakuatsiya qilishga chaqirdi. 

 

“Isroil "Hizbulloh" hujumiga javoban Bayrutga zarba berdi "Hizbulloh"ning Isroilga raketa hujumi Isroil va AQShning Eronga qarshi urushi boshlanganidan beri eng yirik hujum bo‘ldi, unda guruh Tehronni qo‘llab-quvvatladi”, deyiladi xabarda.

 

"Hizbulloh" hujumidan ko‘p o‘tmay, Isroil armiyasi Bayrutdagi guruh obyektlariga, xususan, "Hizbulloh"ning tayanchi hisoblangan Dahiya tumaniga havo hujumlari uyushtirganini e’lon qildi. 

 

Isroil harbiylari otishmalar paytida harakatning 10 ta shtab-kvartirasi, shuningdek, ishga tayyor bo‘lgan raketa uchirish moslamalari yo‘q qilinganini bildirdi.  

 

Isroil Mudofaa armiyasiga ko‘ra, Livanga berilgan zarbalardan so‘ng Erondan Isroilga ballistik raketalar uchirilgan, ularning barchasi tutib qolingan.

 

Islom inqilobi qo‘riqchilar korpusi bu fonda Isroilning ikki davlat hududidan o‘qqa tutilishi "qo‘shma va integratsiyalashgan operatsiya" ekanligini ta’kidladi. Isroil kuchlari bu ma’lumotlarni tasdiqlamadi. 

 

Nashrning qayd etishicha, 12 martga o‘tar kechasi Isroilga Livan tomonidan yana hujum uyushtirildi, bunda uzoq masofali raketalardan foydalanildi. Bu hujum paytida Tel-Aviv va uning atrofida sirenalar yangragan. Eron, shuningdek, Isroilning markaziy qismiga yana bir ballistik raketa uchirdi, Isroil esa Tehrondagi Islom inqilobi qo‘riqchilari korpusi obyektlariga javob zarbalari berganini ma’lum qildi.