Eronning Oliy rahnamosi Mujtabo Xomanaiy ilk bor xalqqa murojaat qildi
Nutq urush, dushmanga qarshi choralar, reparatsiya talab qilish va qo‘shni davlatlardagi harbiy bazalarni yopishga chaqirishga bag‘ishlangan.
12-mart kuni Eronning yangi Oliy rahnamosi Mujtabo Xomanaiy ilk bor xalqqa murojaat qildi. Murojaat “Tasnim” axborot agentligi orqali tarqatilgan va Eron televideniyesida o‘qib eshittirilgan, ammo Xomanaiy kadrda ko‘rinish bermagan. U o‘z tayinlangani haqida Ekspertlar kengashidagi ovoz berish jarayoni orqali bilganini aytgan.
Xomanaiy nutqining markaziy mavzusi urush bo‘lgan. U harbiylarga dushmanga berilgan zarbalar uchun minnatdorlik bildirgan va Eron Hurmuz bo‘g‘ozini himoya qilishni davom ettirishini ma’lum qilgan. Shuningdek, Yaman husiylari, “Hizbulloh” va Iroq qarshilik kuchlariga ko‘rsatilgan qo‘llab-quvvatlash uchun tashakkur bildirgan.
Xomanaiy halok bo‘lgan har bir eronlik uchun, jumladan Minobdagi qizlar maktabiga berilgan zarba uchun qasos olishga va’da bergan. U Eron dushmandan reparatsiya talab qilishini, rad etilgan taqdirda mulkni musodara qilish yoki shunga teng qiymatni yo‘q qilishini ogohlantirgan. Qo‘shni davlatlardagi xorijiy harbiy bazalarga ham bevosita ogohlantirish yuborilib, ularni iloji boricha tezroq yopishga chaqirgan.
Nutqning ichki siyosiy qismida Xomanaiy xalqning Oliy rahnamosiz qolgan kunlarda davlatni boshqarishda rolini ta’kidlagan, birdamlik va o‘zaro yordamga chaqirgan.
