O‘zbekistonda elektr iste’moli bir kunda 267 mln kVt soatga yetib, rekord qayd etildi
Ishlab chiqarilgan elektr energiyasining 20,9 foizi qayta tiklanuvchi energiya manbalari hissasiga to‘g‘ri kelgan.
2026-yil 11-mart kuni O‘zbekiston energetika tizimida mart oyi uchun elektr energiyasi iste’moli va yuklama bo‘yicha yangi rekord ko‘rsatkich qayd etildi. Bu haqda Energetika vazirligi ma’lum qildi.
Qayd etilishicha, shu kuni respublika bo‘yicha sutkalik elektr energiyasi iste’moli 267 mln kVt·soatni tashkil etib, bu o‘tgan yilning shu davriga nisbatan 14 mln kVt·soatga ko‘p bo‘lgan.
Kechki yuqori iste’mol soatlarida energetika tizimidagi maksimal yuklama soat 18:12 da 12 680 MVtga yetdi. Bu ko‘rsatkich avvalgi mart oyidagi rekorddan 480 MVtga yuqori bo‘ldi.
Mazkur kunda elektr stansiyalarida jami 272 mln kVt·soat elektr energiyasi ishlab chiqarildi. Bu o‘tgan yil mart oyidagi ishlab chiqarishdan 12 mln kVt·soatga ko‘pdir.
Shuningdek, ishlab chiqarilgan elektr energiyasining 20,9 foizi qayta tiklanuvchi energiya manbalari hissasiga to‘g‘ri kelgan.
Vazirlik ma’lumotiga ko‘ra, quyosh va shamol elektr stansiyalarining ulushi 14,3 foizni tashkil etdi. Kunduzgi soatlarda esa elektr energiyasi balansini ta’minlashda quyosh va shamol stansiyalarining hissasi 35 foizgacha yetdi.
