Rossiyada Crocus City Hall'ga hujum qilganlarga umrbod qamoq jazosi tayinlandi
2024-yilda "Krokus Siti Xoll"ga uyushtirilgan terrorchilik hujumi oqibatida kamida 145 kishi halok bo‘lgan edi.
Rossiya Harbiy sudi Crocus City Hall'ga hujum qilganlikda ayblangan shaxslarni umrbod qamoq jazosiga hukm qildi. Bu haqda “TASS” agentligi xabar bermoqda.
Ma’lumotlarga ko‘ra, jami 19 nafar sudlanuvchidan 15 nafariga umrbod qamoq jazosi tayinlangan. Yana to‘rt kishi 22,5 yilgacha qamoq jazosiga hukm qilingan. Ular orasida jinoyatchilarga avtomobil va kvartira berganlar ham bor.
2024-yil 22-mart kuni Crocus City Hall'ga uyushtirilgan terrorchilik hujumi oqibatida kamida 145 kishi halok bo‘ldi, 550 dan ortiq kishi jarohatlandi, yana 1700 dan ortiq kishi mazkur hodisada jabrlanuvchi deb topildi.
Rossiya hukumati IShID terroristik tashkilotining Afg‘onistondagi bo‘limi bo‘lgan "Xuroson viloyati" guruhi a’zolarini terakt sodir etishda ayblagan.
Rossiya rasmiylari va Kremlga aloqador ommaviy axborot vositalari ham teraktda "Ukraina izi" borligini ta’kidlagan, biroq bunga dalillar keltirilmagan.
