Sakkizta arab va musulmon davlatlari Isroilning Al-Aqso masjidini yopishini qoraladi

Qatar, Iordaniya, Indoneziya, Turkiya, Pokiston, Saudiya Arabistoni, Misr va BAA tashqi ishlar vazirlari musulmonlar uchun muqaddas Ramazon oyi davomida Al-Aqso masjidining ketma-ket 12 kun yopib qo‘yilganini qoraladi. Bu haqda Al Jazeera xabar berdi.

Chorshanba kuni e’lon qilingan qo‘shma bayonotda sakkizta arab va musulmon davlatlarining tashqi ishlar vazirlari Isroil tomonidan Quddusning qadimiy shahriga va u yerdagi ibodat maskanlariga falastinliklarning kirishiga qo‘yilgan cheklovlarni “xalqaro huquq, jumladan xalqaro gumanitar huquq, tarixiy va huquqiy status-kvo hamda ibodat joylariga erkin kirish tamoyilining qo‘pol buzilishi” deb atadi.

 “Vazirlar ushbu noqonuniy va asossiz chorani qat’iyan rad etishlari hamda qoralashlarini bildiradi. Shuningdek, Isroilning Al-Aqso masjidi / Al-Haram Al-Sharif hududidagi davom etayotgan provokatsion harakatlari va ibodat qiluvchilarga qarshi choralarini ham qoralaydilar. Ular Isroilning Quddus yoki uning islomiy va nasroniy muqaddas maskanlari ustidan suverenitetga ega emasligini ta’kidlaydi”, deyiladi bayonotda.

Bayonotda yana Al-Aqso masjidini hududining to‘liq qismi “faqat musulmonlar uchun” ekanligi qayd etildi. 

Shuningdek, Iordaniya Vaqflar va Islom ishlari vazirligiga qarshli Quddus Vaqflari va Al-Aqso masjidi ishlari boshqarmasi mazkur muqaddas maskan ustidan “yagona qonuniy vakolatga ega tashkilot” ekani ta’kidlandi.

Shu bilan birga, vazirlar Isroilni Al-Aqso masjidini yana ochishga, Eski shaharga kirish bo‘yicha cheklovlarni olib tashlashga hamda musulmonlarning masjidga kirishiga to‘sqinlik qilmaslikka chaqirdi. 

Shuningdek, xalqaro hamjamiyatdan Isroilni “mazkur qonunbuzarliklarini” to‘xtatishga majbur qilish so‘ralgan.

Isroil kuchlari esa masjidda ibodat qilish va  Eski shahar hududiga kirish bo‘yicha qat’iy cheklovlar joriy etilganini davom etayotgan Eronga qarshi urush fonida “xavfsizlik chorasi” sifatida izohlagan.

Biroq chorshanba kuni Falastin Tashqi ishlar vazirligi ushbu yopilish davom etayotgani “falastinliklarning huquqlarini ochiqchasiga buzish siyosatini” yana bir bor ko‘rsatayotganini ma’lum qildi. 

Hamas ham masjid yopib qo‘yilganini qoralab, seshanba kuni bu holat “xavfli tarixiy hodisa” hamda ibodat erkinligining “ochiqdan-ochiq buzilishi” ekanini bildirgan.