Toshkent va Andijonda sintetik narkotik modda hamda kuchli ta’sir qiluvchi dorilar tarqalishining oldi olindi
Qariyb 5 kg sintetik narkotik va 10 ming donaga yaqin kuchli ta'sir qiluvchi dori vositasi to‘xtatib qolindi.
O‘zbekistonda sintetik narkotik modda va kuchli ta’sir qiluvchi dori vositalarini noqonuniy olib kirish bilan bog‘liq ikki holat aniqlandi. Bu haqda DXX xabar berdi.
Birinchi holatda, 2003-yilda Farg‘ona viloyatida tug‘ilgan, Toshkent shahrida yashovchi fuqaro boshqaruvidagi “Nexia-3” avtomobili Toshkent viloyatining Zangiota tumani hududidan poytaxt tomon harakatlanib kelayotgan vaqtda Chilonzor tumanidagi “Erkin” YPX maskanida to‘xtatilib, tekshirilganda avtomobil salonidan sof og‘irligi 4 kilogramm 811 gramm bo‘lgan “alfa-PVP” sintetik narkotik moddasi aniqlanib, ashyoviy dalil sifatida rasmiylashtirib olindi.
Mazkur holat yuzasidan Davlat xavfsizlik xizmati Tergov boshqarmasi tomonidan fuqaro ustidan O‘zbekiston Respublikasi Jinoyat kodeksining 28, 246-moddasi 2-qismi hamda 25, 273-moddasi 5-qismi bilan jinoyat ishi qo‘zg‘atilib, unga nisbatan qamoq ehtiyot chorasi qo‘llanildi.
Ikkinchi holatda esa DXX Chegara qo‘shinlari harbiy xizmatchilari tomonidan o‘tkazilgan tezkor tadbirda O‘zbekiston– Qirg‘iziston davlat chegarasining Andijon viloyati Marhamat tumanidagi “Bobohuroson” mahalla fuqarolar yig‘ini hududidan o‘tuvchi qismida noqonuniy olib o‘tilayotgan dori vositalari fosh etildi.
Ma’lum bo‘lishicha, Qirg‘iziston fuqarosi chegara sim to‘siqlari orqali uloqtirib yuborgan qog‘oz qutini qabul qilib olayotgan vaqtida ikki nafar mahalliy fuqaro qo‘lga olingan.
Quti xolislar ishtirokida ko‘zdan kechirilganda, uning ichidan 9988 dona “Zardeks” nomli kuchli ta’sir qiluvchi dori vositalari borligi aniqlangan.
Mazkur holat yuzasidan DXXning Andijon viloyati bo‘yicha boshqarmasi Tergov bo‘limi tomonidan ushbu shaxslarga nisbatan O‘zbekiston Respublikasi Jinoyat kodeksining 246-moddasi 1-qismi bilan jinoyat ishi qo‘zg‘atilib, qamoq ehtiyot chorasi qo‘llanildi. Hozirda tergov harakatlari davom etmoqda.
Shuningdek, Toshkent aeroportida o‘tkazilgan tadbirlarda Bishkekdan uchib kelgan qo‘shni davlat fuqarosining sumkasidan ham “alfa-PVP” sintetik giyohvandlik moddasi mavjudligi aniqlangandi.
Avvalroq Tojikistondan noqonuniy olib kirilgan jami 77 kilogrammdan ortiq narkotik modda musodara qilingani haqida xabar berilgandi.
