Toshkentda yo'l o'pirilib tushdi
Voqea joyiga bosh vazir o'rinbosari O. Ramatov va poytaxt hokimi yetib keldi, deya xabar bermoqda Zamon.uz muxbiri.
Toshkent shahar hokimligi bugun Temur Malik va Buyuk Ipak yo‘li ko‘chalari kesishmasi atrofidagi tunnel yo‘lida tirgak devorning bir qismi qisman o‘pirilib tushgani yuzasidan munosabat bildirdi.
Dastlabki ma’lumotlarga ko‘ra, jabrlanganlar qayd etilmagan. Voqea joyiga zudlik bilan avariya xizmatlari, texnik mutaxassislar va mas’ul tashkilotlar vakillari yuborilgan. Hodisa sodir bo‘lgan hudud o‘rab olingan, zarur xavfsizlik choralari kuchaytirilgan.
Hokimlik hozirda kompleks texnik tekshiruv o‘tkazilayotganini, tekshiruv yakunlanmaguncha, uzil-kesil xulosa chiqarishga hali erta ekanini bildirdi.
Dastlabki taxminlar qatorida so‘nggi kunlardagi kuchli yog‘ingarchilik ta’siri, jumladan, tuproqning haddan tashqari namlanishi va konstruksiyaga tushadigan yuklamaning ortishi kabi omillar ko‘rib chiqilmoqda.
Shu bilan birga, loyihaviy yechimlar, qurilish-montaj ishlari sifati, drenaj tizimining holati, qurilish nazorati hamda obyektni qabul qilib olish tartibi kabi barcha tegishli holatlar ham tekshirilmoqda.
“Texnik tekshiruv yakunlari bo‘yicha tiklash ishlari yuzasidan qaror qabul qilinadi. Qoidabuzarliklar yoki ishlarning lozim darajada bajarilmaganligi aniqlansa, mas’ul shaxslarni belgilangan tartibda javobgarlikka tortish choralari ko‘riladi”, deyiladi hokimlik xabarida.
