Yoshlar – yangi g‘oyalar manbai: yosh jurnalistlar bilan ochiq suhbat
"Yoshlar kuni” doirasida O‘zbekiston Jurnalistlar uyushmasi rahbariyatining yosh jurnalistlar bilan ochiq muloqoti bo‘lib o‘tdi.
Tadbir mamlakatimizda yoshlarni qo‘llab-quvvatlash, ularning salohiyatini ro‘yobga chiqarish hamda jamiyat hayotidagi faolligini oshirishga qaratilgan davlat siyosati doirasida tashkil etildi. Xususan, O‘zbekiston Respublikasi Prezidenti tomonidan amalga oshirilayotgan yoshlar siyosati doirasida yoshlarning ta’lim olishi, kasb egallashi, ijodiy va professional rivojlanishi uchun keng imkoniyatlar yaratilayotgani ta’kidlandi.
Ochiq muloqot yosh jurnalistlarni qo‘llab-quvvatlash, ularning kasbiy rivoji uchun yaratilayotgan imkoniyatlar haqida ma’lumot berish hamda media sohasidagi dolzarb masalalar yuzasidan fikr almashish maqsadida o‘tkazildi. Tadbirda turli ommaviy axborot vositalarida faoliyat yuritayotgan yosh jurnalistlar hamda jurnalistika yo‘nalishida tahsil olayotgan talabalar ishtirok etdi.
Muloqot davomida yoshlar O‘zbekiston Jurnalistlar uyushmasi rahbariyatiga o‘zlarini qiziqtirgan savollar bilan murojaat qildi. Jurnalistika sohasidagi istiqbolli loyihalar, ijodiy tashabbuslar hamda xorijiy hamkorlik masalalari yuzasidan ochiq fikr almashildi.Shuningdek, tadbirda tashkiliy masalalar yuzasidan ham ma’lumot berildi. Jumladan, Oripov Shuxratjon Orip o‘g‘li O‘zbekiston Jurnalistlar uyushmasi raisi vazifasini bajaruvchi etib tayinlangani ma’lum qilindi.
Shuhrat Oripovning ta’kidlashicha, Jurnalistlar uyushmasining asosiy vazifalari qatoriga jurnalistlarning huquqlarini himoya qilish, ularning manfaatlarini qo‘llab-quvvatlashga qaratilgan loyihalarni amalga oshirish, mediamakondagi jarayonlarni tahlil qilib borish hamda davlat organlariga jurnalistika sohasini rivojlantirish yuzasidan takliflar kiritish kiradi. Shuningdek, uyushma yosh jurnalistlarning malakasi va bilimlarini oshirishga qaratilgan turli loyihalarni ham amalga oshirib kelmoqda. Hozirgi kunda uyushma tarkibida 2157 nafar a’zo faoliyat yuritmoqda.
Uchrashuv davomida uyushma raisi "yoshlar – yangi g‘oyalar manbai" ekanligini yosh jurnalistlar bilan doimiy muloqot olib borish uchun alohida platforma yaratish taklifini ham ilgari surdi. Shuningdek, Yosh jurnalistlar kengashi faoliyatini takomillashtirish, har haftaning payshanba kunini prezidentimiz tashabbusi bilan yoshlar bilan ishlash kuni sifatida belgilash hamda hududlarda, tahririyatlar va oliy ta’lim muassasalarida ochiq muloqotlar o‘tkazib borish rejalashtirilayotgani ma’lum qilindi.
Shu bilan birga muloqot jarayonida yoshlar tomonidan bir qator takliflar bildirildi. Jumladan, yosh jurnalistlar uchun media huquqi va jurnalist etikasi bo‘yicha professional jurnalistlar ishtirokida master-klasslar hamda ochiq darslar tashkil etish zarurligi qayd etildi. Shuningdek, talaba yoshlar amaliyot o‘tash jarayonida ko‘plab byurokratik to‘siqlarga duch kelayotgani, bu borada tizimni soddalashtirish zarurligi ta’kidlandi.
Bundan tashqari, jurnalistlar uchun so‘z erkinligini ta’minlash, turli bosimlardan himoya qilish, shuningdek, ommaviy axborot vositalarida tarqatilayotgan ma’lumotlarni tekshirish uchun faktcheking dasturlarini joriy etish bo‘yicha ham takliflar bildirildi.
