Angrenda voyaga yetmagan qizni zo‘rlagan 4 shaxs 7–12 yilga qamaldi
Jinoyat 2025-yil aprel oyida sodir bo‘lgan.
Jinoyat ishlari bo‘yicha Angren shahar sudida voyaga yetmagan qizga nisbatan zo‘ravonlik sodir etilgan jinoyat ishi ko‘rib chiqildi va hukm e’lon qilindi. Bu haqda Oliy sud axborot xizmati xabar berdi.
Sud jarayonida S.Q. (2006-yilda tug‘ilgan), Z.U. (2004-yilda tug‘ilgan), D.O‘. (2004-yilda tug‘ilgan) va A.U. (2003-yilda tug‘ilgan) voyaga yetmagan S.Y. (2010-yilda tug‘ilgan)ga nisbatan sodir etilgan jinoyatlar bo‘yicha aybli deb topildi.
Jinoyat-protsessual kodeksining 19-moddasiga muvofiq ish yopiq sud majlisida ko‘rib chiqilgan.
E’lon qilingan hukmiga ko‘ra S.Q. (jinoyat sodir etilgan vaqtda voyaga yetmagan) – Jinoyat kodeksi 118-moddasi 3-qismi “a” bandi bo‘yicha 10 yil ozodlikdan mahrum qilindi.
Z.U. – Jinoyat kodeksi 118-moddasi 3-qismi “a” bandi, 119-moddasi 3-qismi “a” bandi, shuningdek, 28,118 va 28,119-moddalari bo‘yicha 12 yil ozodlikdan mahrum qilindi.
D.O‘. – 118 va 119-moddalar bo‘yicha 10 yil 6 oy ozodlikdan mahrum qilindi.
A.U. (II guruh nogironi) – 118 va 119-moddalar bo‘yicha 7 yil 6 oy ozodlikdan mahrum qilindi.
Qayd etilishicha, birinchi instansiya sudining hukmi ustidan taraflar qonunda belgilangan tartib va muddatda Toshkent viloyat sudi apellyatsiya yoki kassatsiya instansiyasiga shikoyat berish va protest kiritish huquqiga ega.
Mazkur voqea 2025-yil aprel oyida ijtimoiy tarmoqlarda Angren shahrida voyaga yetmagan qizga nisbatan zo‘ravonlik sodir etilgani haqida xabarlar tarqalgach jamoatchilik e’tiboriga tushgan edi. Holat yuzasidan 9-aprel kuni Angren shahar IIB tomonidan jinoyat ishi qo‘zg‘atilgan va tergov harakatlari olib borilgan.
