AQSh Eronga qarshi hujumlar davomida yillik o‘q-dori zaxiralarining katta qismini sarfladi — FT
Hujumning dastlabki 100 soatida Qo'shma Shtatlar 168 ta Tomahawk raketasidan foydalangan.
Financial Times nashrining vaziyatdan xabardor manbalarga tayanib xabar berishicha, AQSh tomonidan Eronga qarshi amalga oshirilayotgan harbiy operatsiyalar davomida yillar davomida rejalashtirilgan muhim o‘q-dori zaxiralarining katta qismi sarflab yuborilgan.
Xabarga ko‘ra, bu asosan uzoq masofaga mo‘ljallangan Tomahawk qanotli raketalariga taalluqli.
Strategik va xalqaro tadqiqotlar markazi (CSIS) hisob-kitoblariga ko‘ra, Yaqin Sharqdagi urushning dastlabki 100 soati davomida AQSh kamida 168 ta Tomahawk raketasidan foydalangan. Mutaxassislarning ta’kidlashicha, bu juda katta miqdor bo‘lib, mavjud zaxiralarni to‘ldirish uchun bir necha yil talab qilinishi mumkin.
Nashrga intervyu bergan AQSh kongressmenlaridan biri bu miqdordagi raketa sarfi juda yuqori ekanini qayd etib, bunday zaxiralarni qayta tiklash uzoq vaqt talab etishini ta’kidlagan.
Shuningdek, Pentagon yaqin kunlarda Oq uy va AQSh Kongressiga qo‘shimcha harbiy xarajatlar uchun 50 milliard dollar miqdorida mablag‘ ajratish bo‘yicha rasmiy so‘rov yuborishi mumkin.
Ma’lumotlarga ko‘ra, Donald Tramp ma’muriyati Eron bilan urushning dastlabki olti kuni kamida 11,3 milliard dollarga tushganini taxmin qilmoqda.
