AQSh va Isroilning Eronga qarshi operatsiyasi kamida 2–3 hafta davom etishi mumkin
Operatsiya doirasida asosiy zarbalar Eronning Islom inqilobi qo‘riqchilari korpusiga qaratilgan.
Axios nashrining Isroil hukumatidagi xabardor manbalarga tayanib xabar berishicha, AQSh va Isroil tomonidan Eron hududida olib borilayotgan qo‘shma harbiy operatsiya kamida ikki-uch hafta davom etishi mumkin.
Manbalarga ko‘ra, AQSh prezidenti Donald Tramp harbiy operatsiyalarni davom ettirish tarafdori bo‘lib, operatsiyani faol bosqichda olib borishga qat’iy qaror qilgan. Shu bilan birga, hujumning rasmiy strategik maqsadlari hozircha ochiq e’lon qilinmagan.
Nashr suhbatdoshlarining ta’kidlashicha, Isroil tomoni AQSh rahbari har qanday paytda kutilmagan qaror qabul qilib, jangovar harakatlarni to‘satdan to‘xtatishi mumkinligidan xavotir bildirmoqda. Ularning fikricha, Tramp operatsiyani to‘xtatib, ma’lum sabablar bilan Eron ustidan g‘alaba qozonilganini e’lon qilishi ehtimoli ham mavjud.
Manbalardan birining aytishicha, yaqinda Oq uy rahbari bilan muloqot qilgan amerikalik insayder Tramp “g‘ayratga to‘la” ekanini va operatsiyaning faol bosqichini cheklash niyatida emasligini bildirgan.
Xabarlarga ko‘ra, operatsiyaning asosiy zarbalari Islom inqilobi qo‘riqchilari korpusi (IRGC) tuzilmasiga qaratilgan. Vashington ushbu elita harbiy bo‘linmalarini zaiflashtirish orqali mamlakat davlat apparatiga bosim o‘tkazish va ichki norozilik kayfiyatlarini kuchaytirishga umid qilmoqda.
