Bir qator vazirliklarning murojaatlarning yarmidan ko‘piga faqat yuzaki javob berayotgani tanqid qilindi
Yig'ilishda Oliy ta’lim, fan va innovatsiyalar vazirligi murojaatlarning 64 foiziga, Qurilish va uy-joy kommunal xo‘jaligi sohasida nazorat qilish inspeksiyasi 61 foiziga, Transport vazirligi esa 58 foiziga mazmunan yechim bermagan holda javob qaytargani aytildi.
Prezident raisligida o‘tkazilayotgan videoselektor yig‘ilishida fuqarolar murojaatlari bilan ishlash samaradorligi tanqidiy tahlil qilindi.
Yig‘ilishda ayrim vazirlik va idoralarda murojaatlar bo‘yicha amaliy yechim berish o‘rniga yuzaki javoblar bilan cheklanilayotgani qayd etildi. Xususan, Oliy ta’lim, fan va innovatsiyalar vazirligi murojaatlarning 64 foiziga, Qurilish va uy-joy kommunal xo‘jaligi sohasida nazorat qilish inspeksiyasi 61 foiziga, Transport vazirligi esa 58 foiziga mazmunan yechim bermagan holda javob qaytargani aytildi. Bunday holatlar boshqa vazirliklarda ham uchrayotgani ta’kidlandi.
Shuningdek, Xalq qabulxonalari tashkil etilgan ilk yillarda murojaatlarning 90–95 foizi shikoyat shaklida bo‘lgan bo‘lsa, hozir bu ko‘rsatkich 60–65 foizgacha kamaygani bildirildi. Qayd etilishicha, fuqarolar tobora shaxsiy muammolar emas, balki mahallalardagi sharoitlarni yaxshilashga doir takliflar bilan murojaat qilmoqda.
Shu bilan birga, muammosi hal etilmagan ayrim fuqarolar rahbarlar qabulini tashkil etib berishni Prezidentdan so‘rab murojaat qilayotgani ham aytildi.
Davlat rahbari bundan buyon hokimlar faqat arizada ko‘tarilgan masalani hal qilish bilan cheklanmasdan, muammoning kelib chiqish sabablarini ham bartaraf etishi zarurligini ta’kidladi.
Yig‘ilishda Xalq qabulxonalari faoliyatini yangicha tizim asosida tashkil etish belgilandi. Unga ko‘ra, qabulxonalar endi faqat murojaatlarni qabul qiluvchi organ emas, balki hududlardagi muammolarni aniqlab, tahlil qiladigan diagnostika markazi sifatida faoliyat yuritadi.
