"Hozir "A polosalar" ishlamayapti, ikkita muammo bor" — hokim o‘rinbosari
Toshkent shahar hokimining transport va yo‘l infratuzilmasi bo‘yicha o‘rinbosari “A” tasmali ayrim yo‘llarda test rejimida kamera kuzatuvi yo‘lga qo‘yilishini aytdi. Baxtiyevning so‘zlariga ko‘ra, shu paytgacha yo‘laklar "gost" talablariga moslashtirilgan. “Tayyorgarlik ko‘rildi, hamma ish amalga oshirildi. Hozir qonunchilik darajasida fiksatsiya qilish imkoniyati bor. “Zapusk” qilsak bo‘ldi”, — dedi u.
12-mart kuni Toshkent shahar hokimligida Yo‘l harakatini tashkil etish markazi (YHTEM) faoliyati yuzasidan matbuot anjumani bo‘lib o‘tdi. Mas’ullarning qayd etishicha, markazning “dolzarb 90 kun” dasturida ko‘chalarning 347 km qismida “A” tasmali yo‘laklar tashkil etish rejasi ham bor. Biroq hozirgacha tashkil etilgan avtobus yo‘laklari kutilganidek ishlamayapti, qoidabuzarliklar qayd etilmayapti. Toshkent shahar hokim o‘rinbosari Abdurahmon Baxtiyev shu kabi masalalarga aniqlik kiritdi. Uning aytishicha, bitta kamera o‘rnatish bilan ish bitmaydi.
“Hozir biz test rejimida 1-2 ta ko‘chalarda kuzatuv kameralarini ishga tushiramiz. Sanasini aniq eslay olmayman, kecha muhokama qilingandik. Avvalambor, shu 100 km yo‘lni tanlab olganmiz, shundan taxminan 60-70 foizi “A” polosa, “videlennaya polosa” deyiladi, shuni yo‘laklarga ajratmoqchimiz. Albatta, shu yo‘laklar ishlashi uchun ularni GOST talablariga to‘g‘rilab qo‘ymoqchimiz. U yerda mahalladan chiqish joylari bor, kirish joylari bor. Birinchi, o‘sha joylarni to‘g‘irlab, polosasini normativ darajasiga olib kelish kerak, ikkinchi masala — ko‘p joylarda kameralar qo‘yilgan. Ichki ishlar tizimi bilan hamkorlikda lokatsiyalar belgilanmoqda. Har bitta o‘sha polosada kamera kuzatuvini tashkillashtiramiz. Hozir birinchi navbatda test rejimida yana bitta-ikkita ko‘chani qilib ko‘rmoqchimiz. Uni o‘rnatish jarayoni bor, serverlarga ulash masalasi bor. Juda ko‘p texnik masala bor-da. Faqat kamerani o‘rnatib qo‘ysangiz, ish bitmaydi. Mening ma’lumotim bo‘yicha tayyorgarlik ko‘rildi, hamma ish amalga oshirildi. Hozir qonunchilik darajasida fiksatsiya qilish imkoniyati bor, “zapusk” qilsak bo‘ldi”, — deydi Baxtiyev.
Hokim o‘rinbosari ayrim ko‘chalarda jamoat transporti yo‘laklari ishlamayotganini 2 ta asosiy sabab bilan izohladi.
“Hozirgi “A” polosalar ayrim joylarda yaxshi ishlayapti, ayrim joylarda ishlamayapti. Uning sababi ikkita asosiy sababi bor: birinchisi, GOST normativlariga to‘g‘ri kelmaydi, deylik, mahalladan chiqqanda mashina avtobusga xalaqit berib qolyapti. Ikkinchisi, shu bizning yengil mashinalarimiz zarurat bo‘lganda tezroq yurib ketaman deb yo‘lakka tushib olish holatlari bor. Shu ikkita masalani yechsak, polosa ishlab ketadi”, — deydi u.
Eslatib o‘tamiz, 2025-yil martida Senatda avtobus yo‘lagiga kirgan haydovchilarga jazo masalasi ko‘rib chiqilgan edi. Unda yo‘nalishli transport vositalari uchun alohida ajratilgan tasmasi bor yo‘ldan transport vositalarining harakatlanishi — bazaviy hisoblash miqdorining bir baravari miqdorida, xuddi shunday huquqbuzarlikni ma’muriy jazo qo‘llanilganidan keyin bir yil davomida takroran sodir etilsa — BHMning uch baravari miqdorida (1 mln 125 ming so‘m) jarima solishga sabab bo‘lishi aytilgandi.
