“Ichki ishlar xodimlarining qo‘pol muomalasi va tergov sifati bo‘yicha noroziliklar ko‘p”
Prezident bu borada eng ko‘p ariza tushgan hududlarda xodimlarning kasbiy va muomala madaniyatini oshirish bo‘yicha o‘qitish shartligini aytdi.
Shavkat Mirziyoyev 13-mart kuni aholi murojaatlari bilan ishlash tizimini takomillashtirish bo‘yicha o‘tkazilayotgan videoselektor yig‘ilishida Ichki ishlar xodimlarining qo‘pol muomalasi va tergov sifatidan noroziliklar ko‘p ekanini ma’lum qildi.
Ma’lum qilinishicha, o‘tgan yili ichki ishlar vakolatidagi masalalar bo‘yicha 148 mingdan ortiq murojaat kelib tushgan.
Yig‘ilishda tizim mas’ullariga har 1 ming kishiga nisbatan eng ko‘p ariza tushayotgan Denov, Urgut tumanlari hamda Samarqand, Qarshi, Namangan, Jizzax, Farg‘ona va Chirchiq shaharlarida aholi muammolarini o‘rganish, profilaktika inspektori va tergovchilarning kasbiy hamda muomala madaniyatini oshirish bo‘yicha o‘qitishi shart ekani aytildi.
Shuningdek, Prezident fuqarolar tug‘ilganlik to‘g‘risidagi guvohnomani olmagan bolalarga hujjat rasmiylashtirish jarayonida qiyinchiliklar yuzaga kelayotganiga to‘xtaldi. Bu masala bo‘yicha 448 nafar fuqaro murojaat qilgan.
Shavkat Mirziyoyev: “Bu bolasini bog‘cha va maktabga joylashtirishda guvohnoma talab qilinishi tufayli majburiy murojaat qilganlar, hali ariza bermaganlari qancha?” — deya savol qo‘ydi.
Yig‘ilishda Adliya vazirligiga bu masalaga sodda va tezkor yechim ishlab chiqish topshirildi.
