Isroilda falastinlik mahbusga zo‘ravonlik qilib, qiynoqqa solgan besh nafar askarga jazo berilmadi
Mazkur jinsiy zo'ravonlik ishi bo‘yicha ayblov e’lon qilinganidan keyin yuzaga kelgan muhim o‘zgarishlar hisobga olinib, ayblov xulosasi bekor qilingan.
Isroil harbiy prokuraturasi 2025-yil iyul oyida Sde Teiman markazida falastinlik mahbusga jinsiy zo‘ravonlik qilgan besh askarga qo‘yilgan ayblovlarni bekor qildi. Bu haqda Daily Sabah xabar berdi.
Ma’lumotlarga ko‘ra, mazkur qiynoqlar bilan bog‘liq hodisa o‘tgan yili iyul oyida sodir bo‘lgan. O‘shanda Isroil askarlari Sde Teiman markazida falastinlik mahbusni qiynoqqa solib, jinsiy zo‘ravonlik qilgan. Oqibatda mahbus og‘ir jarohatlar, jumladan, ichak yirtilishi bilan shifoxonaga yotqizilgan.
Isroil armiyasi bayonotida aytilishicha, Sde Teiman ishi bo‘yicha ayblov e’lon qilinganidan keyin yuzaga kelgan muhim o‘zgarishlar hisobga olinib, ayblov xulosasi bekor qilindi.
Sde Teiman – Isroil janubidagi Negev cho‘lida joylashgan harbiy baza bo‘lib, mahbuslarga nisbatan jismoniy va jinsiy zo‘ravonlik holatlari sabab ko‘pincha “Isroilning Guantanamosi”, deb ataladi.
Falastin va Isroil ommaviy axborot vositalari hamda inson huquqlari tashkilotlari ma’lumotlariga ko‘ra, Sde Teiman qamoqxonasida mahbuslar shafqatsiz kaltaklanish, uzoq muddat kishanlab qo‘yilish va tibbiy yordam ko‘rsatmaslik kabi holatlarga duch kelgan, ayrim hollarda bu ularning o‘limi bilan yakunlangan.
Qiynoqqa uchragan mahbus 2025-yil 13-oktyabrda HAMAS bilan mahbuslar almashinuvi doirasida G‘azoga qaytarilgan.
