Isroilda qishloqqa raketa zarbasi berilishi oqibatida 50 dan ortiq kishi jarohatlandi
Isroil Mudofaa Armiyasi Eron tomonidan Isroil hududiga navbatdagi raketa hujumlari yo‘naltirilganini ma’lum qildi.
Shimoliy Isroildagi Nazaret shahri yaqinida joylashgan Zarzir qishlog‘i raketa zarbasiga uchradi. Bu haqda BBC xabar bermoqda.
Ma’lumotlarga ko‘ra, juma kuni erta tongda yuz bergan hujum natijasida o‘nlab odamlar jabrlangan. Hujumdan so‘ng tibbiyot xodimlari 58 jabrlanuvchiga yordam ko‘rsatib, ularni shifoxonalarga yetkazgan.
Isroil harbiylari hodisa joyiga ta’minot qo‘mondonligi xodimlarini yuborganini ma’lum qildi. Ular “favqulodda va qutqaruv xizmatlari bilan hamkorlikda hodisa joyida vaziyatni baholash” ishlarini olib bormoqda.
Shuningdek, Isroil Mudofaa Armiyasi Eron tomonidan Isroil hududiga yo‘naltirilgan yangi raketalar kuzatilganini ma’lum qildi.
